GRUNT: 'Vajni sme trde delati i o tomu popevame'

Kad bi vas zaprosili da opišete Zagorje, sigurne bi vam jedna od stvari na pameti bila i mužika. A kad bi vas pitali e bi ta mužika mogla biti metal žanra valjda bi nam rekli da nisme normalni. E baš takvu mužiku tera se čuje kak nakovenj, kak čelične strune tere rezoniraju Zagorjem, uz lepi i dobri 'kaj' i se ono ke su nam ostavili naši stari, delaju muži z benda Grunt. Oni vam nisu same bend nek i živuća spona z korenima, njihove reči su točne kak obrtnik h svojemu zanatu, a govoriju nam o radišnosti i snagi tera tinja h sakom zagorskom sercu. Čez melodije i ritmove, dočaravaju nam sliku težačkega života i apostrofijeraju posel na gruntu i štujeju našu tradiciju. Ono z čem su nas, a i svoju publiku još osvojili, je i kaj su tak pametno smešni kak klauni na žice i kaj su fejst šarmantni, a i lepi su kak sljika. Još vam moremo reči da mužika za njih nije samo umetnost nek način živlenja teri je gliboko ukorenjen h trdoj zemli našega kraja. Dok se z njima spominate, osmeh vam se proteže od brega do brega. Ovo vam je njihova štorija. Enjoy, rekli bi Ameri.

Za početek valja reči kak vežbaju h garaže, a ime su si dali jer su dane i noći gruntali. Veliju, h Zagorju sme si vični hude i trde delati, a njihova mužika veže se na pristup prema živlenju. Sigde treba hude delati i vane i nutra i na mužike, ali veliju ima jen mali problem, a te je kaj se tu male upliće pokojni Bandić, ali buju to nekak rešili.

- Od detinjstva poslušame rock, pa kesneše metal. Tu h Zagorju je počela Zadruga, te sme si voljeli i sad više pri nas nema takve mužike pa sme došli na ideju da bi trebali tak neke napraviti. Nema smisla igrati na engleskom, a tu sme doma h Zagorju. Živime Zagorje, volime Zagorje i metal i onda te tak ispadne – vele Grunti teri su lani h ovo vreme svoj bend i oformili. Jedne vreme su igrali skupa (ne da je to sad 20 ljet), ali celi život uspešno igraju. - Nekomu naša mužika paše, nekomu ne, ali zate je ciela ideja iza toga baš zezancija, zagorsko narečje tere priziva onaj stari osećaj prema Zadruge. Pokušavame kroz komediju svoj posel prenesti na druge, da nas upoznaju. Imame dobre ideje za scenu, ali to je iznenađenje. One ke je, je da sme vajni delati trde fizički i o tomu popevame. Čak su i praznoverje i coprinice h našim stihovima. Tak da imame i taj dio, kakti horora malo. To je dijel tradicije ke su babice objašnjavale i toga dodatnoga praznovjerja od nekad pa je to potegnuto h denašnjicu kroz tekst. Imame odraz te naše, zagorske baštine h tekstovima naše mužike – spripovedali su nam, a nas je zanimale kak to da snimaju i videje.

- Kroz videje hočeme ljudima približiti to da metalci nisu same hudi i strašni i divlji pa sme iskoristili društvene mreže i koncentraciju mlađe populacije, tera je ipod 30 sekundi, da im kroz skečeve približime zagorsku tradiciju, našu tematiku, da se čuje za nas, da se neke dela. Hočeme ostaviti trag na neki novi način. Dosta je ljudi koji opće ne poslušaju metal i ne razmeju ga, ali su im ti skečevi zabavni. Prosečno, oko dve i pol hiljade ljudi vidi naš video h 30 vur. Generalno su reakcije jake pozitivne. Jedan od naš je došel h bertiju i rekel mu je čovek 'Joooj, sam Bog ke si došel. Došel si denes h 10, si si htel male počinuti? Eh, pak te same tiraju delat. Ideme delat'. Drugi je došel po zvakače h dućan i ženska se okrenula i pitala ga 'Ideme delat?'. Ljudi kužiju. Onda imame tu pesmu Kolnije, kužiš, rožđenje, prasice, te je super. Fora je. Mislime da bu problema z vegeterijancima – vele nam Grunti terima je bit da se zabaviju, ljepe im je delati mužiku, a još lepše to z drugima deliti.

- Bez publike nejde. Drage nam je i ljepe nam se vidi. Nam je bit da se zabavime, a ljepe nam je podeliti te ke je nam ljepe z drugima i da ljudi čujeju i vidiju. Te više nije same za nas nek i za druge. Publika tera ne razme, ne razme. Sejeno je ke ti nekomu veliš ko ne zna nič o metalu, ali nek dojde na koncert. Probali bume na HGF pristupiti pa ak prejdeme onda se vidimo v Regeneratoru, ak Bog da sreču. Probali bume prije toga na Bajere ili negde na gradilištu kad se bu krov pokril i kad se bu zastava vesila. Ili za nekakve ljepe proščenje. Za koncert se bume oprali, deli bume radnu obljeku, zvežvabalji bume i došli bume igrat. Imame šest napravljenih pesmi, a h zraku ih je još sigurne tuljike. Hteli bi snimiti album – hitili su nam bubu h vuhe Grunti teri se za pet ljet vidiju debelši i stareši.

- Če Bog da, pobudili bume stare želje mnogih teri čakaju odavno zaprte pipe. Ima hrpa bendova teri su prešli h prijevremenu penziju i ne igraju, treba ih zbuditi. Treba zbuditi i decu. Pune je njih teri igraju same za se, samozatajni su i treba te aktivierati. Nema toga više kak sme nekad znali igrati. Igrali sme po našim društvenim domovima, meli sme štrumente i nas je bile 30 od kojih je saki igral bar gitaru. Sad nema nikoga. Nema mladih generacija. Počel je istočnjački utjecaj i modernizacija. Zamrl je rock and roll. Jedva čakame da generacije za 20 ljet skužiju da nema mešaljice na bluetooth. Da citirame Kreša Končevskoga: ˝Rock and roll muzika – to nije sad u trendu˝, ali sme zate tuj mi – rekli su za kraj.

Aha, i još – ak ih hočete čujti i videti najdite ih na Facebooku, Instagramu, YouTubeu i TikToku pod imenom Grunt metal. Čujem ose, vidi mese!