Piše: mr. sc. Rajko Fureš dr. med.

Pak je znovič teške vse te videti, jer nemre se drugač niti povedati nek da ljehke nie prejti jer prešla je doba kaj nas je vse gnjela. A vrieme se furt nekam zgubi kak da nie čule da trieba mu zvlječi je tie cajt. Žeja trda ili žeja pospana, bila je morti i nekak drugačka od une na teru se nahčili su mnogi se, ali niti se bile a niti se bu bile same tak vrnuti. A nie se ljehke vrnuti poklje toga gda se hgrezne i skrene naopak. Nie se ljehke zaistinu vrnuti, kak god da te jake bi vsi skup unda i šteli. Zate se je trieba furt zmisliti nate kak rad trieba vse na svietu meti, trieba se je furt toga zmišljavati gda ideme poljek naopačnoga. Morame postati i obrnuti se furt gda vse te naopačne zgledame, moraš iste tak i navek se zmisliti na jedine pajdaše, jer drugeh na svietu mel niesi a niti mel buš. Tak vse dojde ti do toga da od vsega na svietu najgorše je te gda vse h življenju potepeš same tak, gda se nečeš ili neznaš praf obrnuti, a još je gorše gda vse delaš same da naopapak bi se del. Te nie za razmeti, jedine te moči je razmeti unda ak je vse une kaj husebe maš čist krive prešli i ak si si zločicu zel za vse une kaj h življenju bi ti veseljiče biti triebale.

Da je moči vse te nekak drugač spelati, da je moči vsikud se sprekolubitnuti a da nikomu na put došel nebi, da je morti furt moči dober biti, vse te nekak morti se i mogle razmet bi. Ljepe nas Gospon naš vuči da ljubiti trieba je vsakoga na svietu i Najvekšoga iste tak. Ak za vsakoga lepu buš reč mel i navek našel, ak se buš vsikud tak i obračal, ak ti navek vse te skup na pameti bu i ak se drugač h življenju vladal nigdar več neš, unda ti se niti nemre nič druge naopačnoga dogoditi, jer navek buš praf delal i navek buš se praf obračal. Da vsaki med nami same male če posluhnuti več h življenju, da vsaki med nami če male same postati i prie nek nekam krene nekaj i odvrteti po pravice, vse te čist drugač bi zišle. Za priznati nam je i te da triebale bi navek se obračati vsikud i vsigde gde se vriedi, tak da vse une dobroga z dobe življenjske nebi steple vse une druge naopak. Da se iste tak morti i more vse te skup obrnuti unda gda se tomu najmenj nadame - te nam zaistinu je tak, ali une kaj je iste tak trieba po pravice povedati, te je te da ak vse napraviš po pravice, ak se držiš teh reči da dober trieba biti i da trieba vse na svietu z Najvekšem skup rad meti, unda kak god da vse skup oko tebe i oko vseh nas naopačne bu, unda vse te naopačne nebu mogle same tak zločicu ti h srčeke hsaditi. Same dobre i same pravica, same tak da rad vsakoga človeka na svietu ti i maš, same z najčistejšem srčekem sviet ti je moči zmeniti i na bolj ga zdiči, drugač nigdar niti te bile moči nie. Vsi uni kaj drugač su mislili, kaj su se zločice prodali, kaj su zločicu za une najvrednejše k srčeke si zeli, vsi uni su prie ili kesnejše zglajzali čistem po pravice i vsi uni skup prie ili kesnejše su popiknuli se tak da se več niesu mogli niti zdiči ili ak su se i zdignuli poklje več nigdar pravi bili niesu.

Rad bi zeznal, a zaistinu si otom mislim i tak da mnogi bi te zeznati nam šteli, rad zeznal bi te da je jedine une kaj vriedi putec teri poveda ti da vriedi nam ga furt iskati. Nie ga same tak ljehke najti. Istinica je najvekša i te da bi do njega se došle, da mnogi ga iščeju življenje ciele, pak ga najti nikak nemreju, a unie kaj im srečica se nasmeje pak ga najdeju, tak da od veseljiča neznaju kaj bi z sobu. Zate i vsemi nami skup te na pameti bi biti triebale, zate se bi vsi skup več triebali k čoveku obrnuti, do njega držati i ne ga se zmisliti same unda gda same nam nekaj trieba je a čem nam več nič nie trieba da človeka se odhiti i h stran dene kak da nigdar ga videli niesme. Iste tak kak sami se vladame prema unami kaj poljek nas su, iste tak moreme se pririhtati i nate da drugi se buju prema nami tak vladali, jer vse h življenju se prie ili kesnejšu obrača, vse se vrne i obrne. Te nigdar nesmeme pozabiti ili je još bolše te povedati da se te pozabiti smeli nebi, jer unie kaj slabe pamtiju, unie se teške moreju zastanoviti na mestu i teške moreju dulje vrieme same tak opstati.

Pravica navek svoje ma, pravica nemre biti male sim pak male tam, z pravicu se dobre zna - ili je je ili je ne, same je na nami da je se držime i da se po pravice h vsakom srčeku živi.