Piše: mr. sc. Rajko Fureš dr. med.

Najtežejše človek je biti je i ostati, te morti mnogami denes zgledi tak kak da pripoveda im se nekaj kaj šteli i triebali poslušati niesu. Ali kak god da je i kaj god verovali, navek zide tak, vse te skup, tak da jedine praf je po pravice življenje obrnuti se. Nemrem pripovedati otom kakvi drugi su kaj po svietu hodiju, te niti je ljehke a iste tak niti navek nie ni najlepše. Zaistinu te nie moči ni navek, jer sigurne je i te da se življenje naše za življenje more zvati, same ak ga draga se i ak se do njega držati če. Ljehke nie, a iste tak niti nigdar te bile nie, kak god da te če ili neče se posluhnuti, vsaki med nami križeka svojega navek na pleča nosi. I pak stoji i te da nihči drugi meste nas te na plečami nositi nemre. Nie vriedne ljudi hništavati, nie vriedne ljudmi zločicu delati,nie vse te skup vriedne same da sebe moreš nekaj bolšega napraviti. Još je gorše unda gda tu zločicu vsemi delaš unda gda nič ti ne fali i gda vse na svietu maš, tak da je te une najgorše kej se razmeti h vsemu tomu se more.

Človek nie biti ljehke, nigdar te ti ni nie bile a teške da igdar te ljehke ti i bu. Dobre nam se vsemi skup kaže i te kaj vriedne je, kam vriedne je i zakaj vriedne je. Nie ljehke vsemi povedati kaj je te kaj dobre se piše, kaj i kak te zaistinu i vriedi i kam se po pravice more vse te skup i odvrteti. Te zaistinu tak i je, kak god da se more odvrteti vse te skup na jednu ili na drugu stran, največ put ti se dogodi tak da niti nemreš znati odkud te vse te skup je hpičile i kaj vse te skup nam i vriedile je, dok se male po male nie vse hmirile.
E se more človek biti, e je ljehke človek ostati i e ljehke življenje je meti i živeti tak kak človek ga jedine i živeti more, vse te je une kaj nas vlječe i mami, vse te nam dihati neda, vse te nas pošilja vsikud i vse te skup nas vsigde same zastanavlja. A človek se zastanoviti nesme, človek navek mora napre iti, človek kak god nie ljehke biti – iste tak nesme nigdar senjati prestati, jer ak te prestal bu niti človek več nigdar bil nebu.
Tuj meste nam je, vsakomu med nami, vsakomu človeka, od mesta toga kaj denes ga mame, drugoga nam mesta na svietu nie. Čuvati tu najdrajše meste na svietu nam je trieba, čuvati ga i dragati za vse une vrieme kaj pred nami došle bu, čuvati ga trieba radi vsakoga pajdaša, vsakoga človeka, vsakoga cajtega življenjskoga, od teroga niti lepšega na svietu nie. Da te je ljehke, te zaistinu nihči niti nemre povedati, da te je same tak moči, otom se iste tak spominati moreme, ali da iste tak te se splati, te je vriedne i te je jedine praf i moči, kak god da se če vse te skup vrnuti, obrnuti ili potegnuti.

Splati se negdar male i pobeči proč, človek si grunta e vriedi se boriti unda gda znaš da od toga nič mel neš, pak se vse te skup niti nemre drugač zestati nek je te bile več na lete zazlamenjene, a bile te je zaistinu praf. Gdo se z vsem tem če boriti, gdo se bi pred zid sam hitil, gdo se bi štel pak najti sam na svietu? Odgovor je takef da poveda da nie nas pune kaj z tem bi se borili. A pak, stoji i te da najgorše je sam biti. Najgorše je i te gda nikoga več na svietu ti nebu, gda se sam z sobu ostal buš spominati, gda iskal buš pajdaše a pajdašeh ti bile nebu i gda sam ostal buš tak kak nikomu te štel niesi, kak da si na puste pustače, i kak da zgledel si si kak da na svietu sam si je.

Kak god da je te teške, iste tak ak srčeke maš - vse te skup i nie pre teške, jer srčeke prave vsakomu pravomu človeku une je kaj vriedi, une je kaj vsemi nam trieba, une je kaj se vsikud iskati trieba i za kaj vriedne se je boriti. Ak srčeka nie, vse druge na svietu čist je zabadaf. Vse te skup čist na opak je ak nie nam srčeka, a ak srčeka nie nie ni človeka. Zate je vriedne človek biti, vriedne je človek biti i človek ostati, vse te skup niti se nemre po pravice tak niti spelati ak nie nam človeka, ak niesme vsi skup mu na pomoči i ak niesme vsi mu poljek gda največ te mu je i trieba. Te tak trieba za vsakoga biti, te trieba biti je najmenjšem i najvekšemu, pak nam se nadati, po pravice, da te tak i za vse nas vriedile bu, jer same je tak moči človek biti i ostati, človek biti i opstati.