Piše: mr. sc. Rajko Fureš dr. med.

Same dobre, same une kaj vriedi, same čiste i najtoplejše srčeke domače, same ljubav jedina, same putec pravi, same rojža dišeča, same vse te skup pomoči moreju srčeku žalosnomu i dati mu vse une kaj največ trieba mu da na pravi se put obrne. Pak povedame i otom da zaistinu zločica nie ni nesme putec življenjski biti. Te da te vsi skup zname predobre - te je jedne. Na drugu stran nam vse te skup dojde tak da pak se niti vse skup drugač rastumačiti nemre nek je tak kak je i da več niti nezname kaj i kak se skup držati vse te skup i more. Druge nam i drugač vse te zgledi, gda se najdeš pri tom da se do pravice ne drži, pak vse h vsemu se več nezna ni kam se deli bi. A praf za praf je još gorše gda pajdaša pogledaš i gda ti se vidi kak da najbolši je i da od njega bolšega nigde nie. Da tak je te vsaki morti nemre drugač niti misliti, a niti se drugač nič niti otprieti nemre, jer vse te skup prie ili kesnejše same na jednu se stran more otprieti. Niti se bormec drugač vse te skup nemre ni otpirati nek tak kak da vse te skup ma svoju dobu i svoje meste, a praf za praf niti nemreš več znati kaj te je i kam te pe. E praf za praf te dobre vsi skup zname, ali po druge strani – e se toga i držime, otom se more i trieba spominati. Da drugač se zaistinu nebi znati smele – i te nam je poznate. Iste tak stoji i te da se nesme nič druge niti povedati otom. Same, une kaj jedine nam stoji je te da najtežejše je vse te skup zdržati jer vse te skup ljehke i nie, ali bez toga se nemre i nesme.

Da same se držime unoga kaj poveda da nič novaga pod sunčekem nam nie ili kak su naši stari povedali „Nihil novum sub sole“, unda nam zaistinu niti nebi mogle se dogoditi te da bile kam z mesta geneme bez navade prehude. Ljestinje, vse une kaj je pred i oko nas na ljete bile, same bi tuj ostale i ne same te, nek bi vsega toga smrada z vsaku dobu bile još i pune več. Zate i nie nič za zameriti nikomu ak če male si zmesti pred vratami, jer drugač niti mu je smeti ali iste tak ni moči h vsemu tomu se vladati. Dobre je putec življenjski, drugač niti more biti a kak sme i male prie povedali – drugač se nesmeme h življenju ni vladati. Jemput gda sam sebe lagati buš počel, gda sam sebe buš povedal kak črne je bele i kak bele je črne, gda sam sebe hveraval buš da te tak je, unda ti priznati vsi skup triebali bume da te več nie unie pajdaš kaj do male prie med nami je bil. Da te tak je i da te drugač nemre biti, nie te od denes a niti od hčera. Jedina je domača reč, domači kaj, rieč horvacka, najslajša, te je rieč kaj vraštve najbolše je za vsaki beteg, kaj vsaku zločicu odtira, kaj vsemi nadu da i vse na pravi put otpela, kak nikaj do zdaj. Horvacka, domača reč, te je une najsvetečnejše kaj med nami mame, te je reč kaj same jedne more, a te je po istinice povedati, jer horvacka reč drugačka niti biti nemre. Vse une naopačne nie od dobroga srčeka rojene. Vse une naopačne, vsaka zločica, vse te skup krive nasajene more dojti same od drugud, od onud gde sunčeke h jutre videti moreme. Te pak ne stoji da čistem tam nie i nekaj dobrega, ma i tam dobreh ljudi, ali od gda zname zase, od gda su nas h svoje kole metali, ž njimi nič dobre doživeti mogli niesme, od njih sme same dobiti zločicu mogli, mukicu najvekšu i beteg najgorši. Te je tak, te navek na nam vsemi na pameti, te je istinica jedina, jer za nič i nigdar zločica nam nesme na srčeku biti, h srčeku nigdar meste nesme meti. Zločica ta nie a i nesme putec življenjski biti, tak kak Najvekši navek nas vučil je.