Piše: mr. sc. Rajko Fureš dr. med.

Vlječe se mnogi put, tak kak da prime te vsikud i vsikak, kak da se same tak obrnuti pak vse te skup se more, a vse jedne zide kak nam navek tak kak zide. Ljehke je z luckem gospodariti, te sme mogli mnogi put čujti, nie te prvi put da nam je življenje prinesle nektere pajdaše kaj ljehke su se mogli takvoga posljeka prijeti. Da ma nekaj hutom kaj starejši su povedati nam znali – ma. I unda ti jasnejše je i te za razmeti kaj su nam povedali, a vsejedne ti za razmeti nie čiste moči nji te kak se je pripetile da vse te skup same more naopak prejti. Druge je ak krive nasajen si a i ak se češ male i obrnuti, unda ti nič pomoči nemre da bi drugač nekaj se napravile, a nekaj čist trejtoga na pameti ti bile je. Ak ti je poljek toga na pameti same te kak bi nekaj pospravile se h žepeka i kak bi nekaj si pribermale čem prie, unda se tuj več nič niti nemre. I kaj ostaje – same spominek otom kak vse te skup prejti trieba, a ak se dela o unomu kaj krive nasejene još bolji i čem prie.

Najgorše je gda te prime, gda te počne vlječi, gda več si pomoči nemreš jer rukica ti same bežati je počela pak se nemreš niti sam z sobu zestati a da se ne hloviš kak si žepeke si dobre podfutral. Najgorše je kaj tuj se stati nemre, kaj vlječe te, kaj nemreš si pomoči, kaj same vse dalše ideš, jer gda vse te te vlječi počne i gda ti tuj penezeki zadišiju – z toga vsega zvlječi ti več se neda.

Kak god da štel nehči bi po nekom z prstem kazati, kak god štel bi obrnuti une kaj se teške i z mesta pomekne, vse te skup jake ti žmehke je i z tem se neda niti nič poštenoga početi. Doba ta kaj spamtiš je se po detečjami puti, po puteh po terami si obračal se dok po fustah si se španceral i vrganjčeke iskal. Iste tak si i ljesičkice rad bral – a najlepša ti bila je duha, dišoba ta kaj mele su ju. Tak prelepe su dišale tak su ti fine dišale, ta doba prešla je i več je se praf niti ne, štel bi navek da poljek tebe ta dišoba je. A vrieme vsu ti se spremenile, tak da se zapitati vsaki med nami trieba kam prešli su uni cajti i vsaka ta dišoba, kak se te dečec tie spremenil, e te zaistinu još ostal je isti človečec, e igdar ga več bu povlječi mogle po se putecu starom. A kak bi se spamtili vsi med nami i kak bi odgovora dale se na pitanje tu kaj je te bile, kam se je skrile, kaj je štele i kam se je dele – te nekaj je čist drugač. Zakaj se je sprešle, kam te je došle i zakaj vse te skup tak je zišle, pune te put nie niti moči si rastumačiti, jer se tuj niti nema kaj za rastumačiti, jer je i za razmeti da nie moči same tak rastumačiti une kaj naoapak nasajene je.

Praf h življenju se vladati, pravu stezicu si zebrati, ne krajiti i ne skrenuti, vse te skup mnogi put človeka zna vlječi, povlječi i odvlječi. Do hčera su ga znali kak pajdaša, človeka i poštenjaka, a denes po njem z prestem kažeju kak po najvekšemu tatu, mrčnjaku i unomu kaj pomoči ti nigdar mogel nebu, jer mel cajta niti nebu. Vsa ta doba , vsu tu vrieme, ciele te droptinje i vsu tu vraštve, vse te skup nemre dati srčeku vse une kaj zgubile se prek noči, od unoga cajta gda po prvi put mu rukica h krivu stran je prešla. A i nie za zameriti vsakomu, morti je male i za razmeti vse te moči, ali za razmeti nie moči te kak se je vse te skup štele razdrieti i razleteti, pak se je jeden mali človečec moral hmeknuti se jer več pri tom posljeku nie mel kaj za delati.

Moreš h kole iti ili h kolu neš, sam vsaki otom si mora spregruntati dobre, jer moči nie na dva stolčeka sedeti. Sigurne je da mnogi med nami šteli bi na dva stolčeka sedeti, morti i tri, četiri ili več, jedne vrieme im je te morti i nekak za ruku i išle, ali prie ili kesnejše buju se stepli i z jednoga i z drugoga stolčeka, pak sami kak bogčeki najvekši unda več znali neju kaj te dogodile im se je.

Poljehku pak praf, morti starinski te reči zvoniju, morti te ne stepeju unak kaj te stepava nekaj kaj žuglja ti kolubarčeka i kaj te greje za trdanjek, ali iste tak navek ma stari, dobri i najispravnejši put. Poljehku pa praf, jer drugoga puta smeti biti nesme, jer vse morti drage ti te se vidi, kak je lepe prek noči vse si te pribermati, kak je lepe meti penez tulike kulike ih cieli kraj za cieloga svojega veka mel nebi, ali iste tak ti je istina i te da sreču, mir i dušu človeka ž penezekami „najslajšami“ kupiti mogel neš, kak i mira kaj dušice največ trieba, dok po noči se obračal h švicu buš.