Piše: mr. sc. Rajko Fureš dr. med.

Po pravice se jedine živeti splati, po pravice, po unom kaj več od une dobe najdavnejše zacajhane je med vsemi nami, kaj nigdar za druge mesta mu nie vekšega nek je meste kaj se zove unak kak mu je doba prava. Da navek nie vse unak kak šteli bi, da več put se zazlameni i od zlamenke poklje toga se več nič niti najti nemre - vse te življenje je. Najgorše ti unda je gda prvi te put po čeljenjke speče i gda se nemreš obrnuti a da ne zmisliš se kak drugač ti je mogle biti vse te skup. Vsakomu se dogoditi more, vsaki more dojti do toga da nie ljehke mu, da zločica tak ga grde stisne da misli si da več nie mu kam moči prejti i da več mu vse skup gotove je. Negdar krene ti praf, negdar bi vse pred sobu zrušil, negdar na jeziku najjakšejši štel bi biti i negdar nemreš une kaj je jedine praf zgledele. Po druge strani zgledi ti vse te skup kak nekaj kaj neda se same tak pomeknuti, zgledi ti tak da i unda gda misliš si da moči ti je – ti te niti probal niesi jer neznaš kaj z sobu bi.

Nie niti moči za povedati negdar nič otom kaj je praf, jer kak vrieme dalše ide i kak se vse te skup bolj obrača, vse jedine prežmehke se obrnuti more. Najgorše je gda beteg i zločica te hloviju, unda si pak sam nemreš ni dopovedati da tuj meste ti je, iste kak i da nikam drugde nie ti moči prejti – jer domeka same jednoga maš. Dok vse te skup buš razmel, dok se probal buš razbuditi, vse te nemre ti ni drugač se sposložiti nek unak kak te i nebi. Još je gorše unda gda nehči drugi z tobu krmani, gda gospodara stranjskoga maš, gda sam nič nemreš niti spremeniti a još menj gda tak nemreš niti napre genuti z sobu a i z vsem unem kaj triebal bi praf potirati.

Morti i ovak zgledi tak kak triebale nebi, morti se človek more drugač i postaviti, ali kaj je tuj je – navek se niti nemre vse spelati unak kak šteli bi. A ak čeme praf opstati, a ak čeme te i za vse skup, unda nič druge nemreme nek se zdignuti mam, zdignuti i dotrgnuti vse une kaj naopačne je. Da te tak trieba, da tak najbolše i jedine bile bi, da se drugač nemre i nesme, vse te kak da sme prvi put čuli a ne znali od prie dugog cajta. A te tak je kak je, te se neda drugač niti posložiti ak se neme sami zate zborili. Ak bume sedeli na mestu i ak bume same čakali da nam nekaj h putaču bez muke skoči, unda sigurne je same te da več beteg tie zbeči mogli neme.

Une kaj vse nas skup more zdiči, kaj vse nas skup jedine držati more – te je same kuraža, te je same življenje tere na istinice i pravice se rodi, kaj se drugač niti nemre delati. A življenje kak i vse druge, vse te skup ti niti se nemre drugač posložiti, nek same tak kak sami sme si posložili ga.

Unda, gda si misliš da nemreš zbeči, unda poiskati ti je trieba najtoplejši del srčeka. Hunjem je jedine ti najti moči najlepše senje, hunjem moreš najti vse une kaj jedine te potirati more da se zvlječeš, da se zdigneš i da vsemi moreš povedati da tuj si, da živiš.

Nesmeš se niti predati a niti prodati - za nič na svietu. Jemput gda se prestal bi ili buš boriti, več neš nigdar mogel vrnuti se na pravu stran, navek buš ostal tam gde nihči te nebi ni štel. Zate stati nigdar nesmeš, dok najzajdnejša ti se vura vrti prestati se nesmeš boriti, jer življenje vriedi živeti do najzajdnjega daheka.