Piše: mr.sc. Rajko Fureš dr. med

E denes srama ma, e sram je med ljudmi teri na sram su pozabili. Uni bi morti pred drugami ljudmi i šteli pokazati da sram ih je, da do srama držiju, ali unda gda trieba im nekaj je po tom pitanju i povedati, unda nič več nie unak kak triebale im iti je. Da tie dragi nam pajdaši srama maju, denes nam se nebi dogoditi mogle te da jedne nam povedaju, da druge po skrivečki delaju, da trejte iste tak si spremišljavaju.

H iste vrieme nam bi po četrte strani šteli povedati kak h vredu niesme i kak se bi popraviti triebali. A življenje, kaj življenje ma z vsem tem, kaj življenje povedati more otom zakaj vsaki med nami zabludel je – ne jemput, i zakaj nie posluhnul sebe a i vse une kaj dobre šteli su mu?! Iste tak dok si otom štel male bolj bi i spregruntati – pred očmi ti dojde te da nemreš zmeknuti vse te reči, da nemreš ih stirati nikam proč, da nemreš se ž njimi zestati, niti male a niti preveč. Gledeti nie same tak moči, niti drevlje, niti živinu, niti vse nas skup kaj pod kapu nebesku Bogek najdrajši kak dečicu svoju najmilejšu drži. Nie vse te ljehke, meste da vsi sme skup kak dečica mu najmilejša, da se na kupu i pod ruku držime, da meste da si vsi skup jen drugomu pomoreme si, h istu se dobu vladame kak da sme najgorši si. Te zaistinu tak i zgledi, kak da sme uni teri za nič druge niti neznaju, nek same zate – kak čem prie i čem bolj se bi zmeknuli, kak negde drugde i nekteram tam bi hteknuli i kak si bi čem prie i čem več pribermali. Kak god da vsaki sebe povedat bi štel da tak nie praf i da tak nebi smele iti, iste tak vse ti te skup ziti jedine trieba, a i navek zide tak na jenu stran, kak putec teri nezna nič druge nek same kak zabludeti unde gde se zabludeti nie mogle.

Da te nehči navek h življenju čaka, te iste tak stoji, da nehči te z veseljem se tomu posljeku pririhtava – te male menj ti se put dogodi, ali se vse jedne negdar i dogodi. Da nehči te čakati neče ili nie štel – te iste tak istina je najvekša, tak da vse te skup niti nič druge ti donesti nemre nek same jedne velike spremišljavanje.

Da človek zna navek svoje meste, da se zna obrnuti kak i kam mu trieba je iti, da če vsemi skup se na pomoči najti, da male več h življenju štel bi i na druge misljiti, unda vse te skup drugač ziti bi mogle. Najgorše je h ciele dobe življenjske te da male gdo svoje meste zna, da iate tak mnogi čeju dojti na stran gde mesta nigdar bile im nie i gde nigdar niesu niti bili. Najgorše je te kaj se z vsem tem skup nemre človeku bližejše dojti, kaj mu se neda nič dopovedati, jer vse jasnejše ti more biti same ak se spamtime dobre unoga kak Gospon naš štel je spasa za ljudi h Sodome i Gomore, a uni ga niesu ni posluhnuti šteli, nek su delali po svojem naopak.

Tak dok poslušaš kak te nekteri tam pajdaši počkaljiti bi šteli, a do male prie su te falili na vse strani, dok ih tak poslušaš nemreš ih ni poznati. Kak god da te štel bi razmeti – razmeti nemreš kakvi su te ljudi ž njeh se sprekolubitnuli, jer do male prie niesi mogel niti znati da tak se nekaj more pripetiti. Da tak te je – je, same neznaš kak si bi rastumačil te gda tie ti pajdaši dojdeju poljek, dok se držiju tak kak da nič se dogodile nie i dok se bi šteli mam stobu družiti i z tobu dobri biti, kak da nie hčera nekaj druge bile, kak da hčera niesu te po plečami hdrli, tak kak nihči do zdaj hdrl te nie. I znam dobre da nie ljepe, znam dobre da nie hvredu niti te povedati, a znam dobre da iste tak človeka teri je pun jada husebe nemreš zastanoviti da une kaj na srčeku mu je – i pove. I unda gda toga pajdaša pita – „Pokej si ti tuj došel?!“, „A kaj ti tuj delaš?!“, „Gdo te je tuj zval?!“ i „Kak te nie sram tuj biti?!“, gda vse te skup mu je povedal, unda več neznaš kaj po tom pitanju bi i povedal. Da nie ljehke nič več tomu povedati, da nie ljehke pri tom pameten i biti, da nie same tak se zestati z nekterem pajdašem teromu si vse h življenju dobroga del, da nie ljehke, da nie vse jedne, da tuj se pajdaš vsaki nemre same tak snajti, te tak na kraju je kak je.

I gda tak se z tobu šteli nekteri tam spominati bi, gda se šteli bi pred drugmi oprati da zdignuli se bi još vižejše, unda same priznati si moraš da same i navek gor pa dol – življenje je!