Piše: mr.sc. Rajko Fureš dr. med

Stara nam istinica poveda da unoga teri po tebe kamenje hiče ti z kruhem nadeliš. Nie te same tak moči, pune je toga tuj trieba pregristi i husebe pretreči - ali se da, same je šteti trieba, same je trieba veru imeti. Jemput se morti vsaki med nami more i spreračunati, dva tri put morti i zabludiš – ali furt nemreš hnadol i naopak se postavljati, jer kak god da je - vse te skup niti furt praf ziti ti nemre. Vsaki put, gda te morem, navek z veseljičem z decu h cirkvu krenem. Vsaki se put veselim kak nekaj lepoga i dobrega čujti bume vsi skup mogli, kak vsaki med nami teri sme se h cirkvice našli, a iste tak i uni najdrajši nam kaj sme na kupu se zbrali. Reč je une najlepše, reč najtoplejša, svetečna, reč po tere nam Jezušek naš poveda da bolši triebame biti, da se navek zločice nedame i da navek sme vsemi ljudmi tuj gda največ im pomoči je trieba. Navek se nekaj moreš dobroga nahčiti, navek ti se pak po pameti vrnuti more nekaj kaj duge ti na dušice bile nie i kaj se triebale ponoviti da bi se pak spamtiti ti bile moči.

Da vse te človeku pomoči more – te vsaki med nami dobre znati more. Da se je moči morti i male drugač do vsega toga držati – i te stoji. Još bolše ti je unda gda lepa reč veseljiče ti pak donese, unda gda nie ti ljehke, unda gda pobeči bi štel, unda gda sam sebe neznaš več nič niti povedati pametnoga. I tak, dok ti negdar je najžmekšejše, dok vse te trga i dok dihati ti neda, vse te skup ti če povedati da vriedi živeti, da vriedi se stati, da nesme se zločice dati da hništi te, da nesmeš dati da hiti te i da zdiči ti neda. Da vriedne se bile navek zdignuti i da je bolše bile obrnuti se na pravu stran navek, te je une kaj zbeči se nemre. Navek žmeklina se zbeči nie dala, navek je una bila ta kaj se nie dala same tak potrieti vsaki put gda nie nam ljehke bile, tak da se navek same more strpeti, počakati i vrieme dočakati.

Kak god gda god te nekaj bu pomeknule z mesta gde si se furt znal zaležati, tak da negdar dok se tomu i najmenj nadal buš - vse ti pred očmi se razdenile bu. Jemput nekaj vsejedne te pustile nebu, jemput se pred oltarekem buš našel, i kak da nekaj te sprehitile te bu, jer znal neš kaj tuj delaš. Gda buš sam sebe gledel kak se z mesta pomeknuti nemreš, vse une kaj pred ljudmi si spelati štel kak uni kaj navekši je i najbolši, kaj same da oltareka poljizal bi, vse te kak da zadrvenele pri tebe bu. Hutom cajtu mam more ti se zbuditi, moreš videti vse une kaj videti niesi štel, morti buš se videl kak naopak si krajil, morti buš zaistinu se popraviti štel i morti buš se vrnuti putecem pravem probal. Morti, a te dobre je poznate – jer takveh ljudi pune ma, a čemu vsakoga dneva posvedočiti moreme, moguče je da tie pajdaši kaj največ zazavaju te prvi se zmenili buju. Morti skrenuli buju a morti nigdar tuj neznaš. gdo zna, h življenju vse moguče je!

Ak tie pajdaši te razmeti nemreju ili još je bolše povedati da te razmeti neti nečeju, unda nas vse te skup vse jedne nesme zastanoviti da mi sami probame bolši biti, da une kaj do zdaj nie nam veljale popravime i da prejdeme navek tam gde je vse une kaj dobričke je. Drugač nigdar nesmeme i drugač nesme niti se nič odvrteti, jer vrieme je tu kaj se same obrača dok nam zgledi kak da same stoji. A da nekaj trieba vsaki pred sobu zmeniti, da trieba se skrušiti, da trieba je vse une kaj ne velja odhititi – te nam na prvomu bi mestu triebale biti. I kak god da negdar sme hudi, kak god da nemreme zdržati da kričali nebi i da pred vsemi nebi povedali kak nas boli i kak su nam zločicu napravili, vsejedne se zastanoviti nam trieba, vse jedne morame pregledati i pred vsemi povedati da popravili se bume.

A unie pajdaš kaj zločicu ti je napravil, ak se bu štel vrnuti k Jezušeku – još bolj, ak se nebu štel – unda tuj nihči mu več pomoči mogel nebu. Une kaj mi triebame držati je te da navek na zločicu z dobrem se obrneme, nikak drugač, jer same tak pokazati mogli bume da dečica sme Mu.