Piše: mr.sc. Rajko Fureš dr. med

Nie ljehke unem kaj nemaju zakaj živeti, kaj življenje si potepljeju hutom kaj vsakoga dneva sim pak tam hodiju. Mnogi nam se put po pameti vlječe spremišljavanje da zeznali bi odgovora na pitanje – za kaj živeti.

Sigurne je i te da morti nehči misli si a morti nehči i ne - da se ma za kaj živeti, a une od čega nemre se a i od čega trieba nie pobeči je same te da unie teri je veseljiče življenja h življenju našel, najbolše zna da življenje smisel ma i da vriedi živeti. Tie kaj povedaju da življenje se same spotepsti more, da nie vriedne živeti, vsi ti ili su življenje potepli, ili su krivoga puta našli pak več nikam ni nejdeju, pak same stojiju, mučiju i mudiju, tak da niti se več spuknuti z vsega toga nemreju.

Prejde vse, prejdeju ljete, prejde doba gda si si penezekof prepune h kolubaru pribermal bil, prejte vrieme gda lucke si ljetrikice drl, vse te prejde. Une kaj zbeči se nemre je te da tu se vrieme več nigdar povrnule nebu, da steple ga bu i odnesle vsikud vse te kaj je bežale od senčeka kaj jedine ga mele je. Od navek nič nie za navek ostale, od navek vse svoju je dobu mele, od navek vse se dodojde, prije ili kesnejše. Tie dragi nam „pajdaši“ misliju si da za navek vrieme njihove bu, misljiju si da navek zubljali buju - iste tak kak denes zubljaju.

Da morti se kaj dogodile nebi i da morti nebi kaj pobegle, tie naši „najdrajši pajdaši“, zubačice su si prave pririhtali, tak da zubljeju najemput tak kak do zdej se zubljale nigde ni nie. Morti bi nehči povedati i mogel da se tuj dela otom da vse te zgledi kak da je h pitanju ljestinica najsuhejša, ali ljestinice tuj nie, tuj se dela o paperekah kaj maju frulice, orleke i ostalu živinicu. Buntek ovak ili onak ide čem vekši, a rit im puta videla več zdej je tak i tulike, kulike vsi skup h našem kraju videli ju niesu. Nie bile mesta gde več naši dragi pajdaši bili niesu, ob luckom, same još ih triebale bi poslati na južnoga ili još bolj na severnoga pola, jer od tam se morti ni vrnuli nigdar neju, pak bi vsemi menjša štetica nastupila, za dugši cajt. Šalu na stran, nie nikomu žal, naj same tie nam „pajdaši“ putujeju, naj same vsikud po svetu hodiju, naj nekaj i vidiju, jer morti buju pred penzijicu se nekaj več i nahčili od zubljanja toga žmehkoga.

Najgorše za istinu je unda gda za nič nemaš živeti, gda sam sebe bi štel dopovedati da najvrednejši si, da sviet se same oko ritesnic tvojeh obrača, da za te tvoje najdrajše ritesnice prodati moreš a i po svaku cienu moraš – sviet cieli. A življenje si tak nie same jeden potepel, kak god da su penezeki h pitanju bili, kak god da vrieme je znale vse te skup obrnuti negda i male h stran, te pajdaše, kaj krive su nasajeni bili, obrnuti ti več nigdar bile moči nie. Une kaj skrene, kaj dušicu je naopak obrnule i naopačnomu ju za sveklji gumb je prodale, vse te nema dugu dobu i vse te skup nemre praf ziti.

Človek kaj srčeka najčistejšoga ma – ma za kaj živeti. Njemu nie trieba niti penez, niti stanja najnovejša, niti ljetrikic najfljetnejšeh, nič mu od vsega toga nie trieba da bi bolši človek bil. Ak človek niesi, ak same ti penezi na pameti su, ak nič ti vekše veseljiče ne dela od toga da unoga poljek sebe hkaniš – moreš sam sebe se smejati kak praf pameten niesi, ili si morti krive nasajen, a morti si i jene i druge.

Same je Jeden, same je Najvekši, same je Jedini kaj puta nam kaže, kaj od veka je do veka, za navek. Same je jeden i pravi putec tie nam – Jezušek naš!