Piše: mr.sc. Rajko Fureš dr. med

Pak te povedati vsemi štel bi, a neznam e več se splati kaj govoriti. Kak nekterami rastumačiti človek bi mogel – kak penezi niesu vse na svietu, kak nesme se pred penezeki klečati, a vsaki med nami dobre vidi da došle je te tak da bez penez se nemre. Tuj, kak god da držiš do reči, poštenja i vsega unoga kaj si kak navuka si zebral, vse te skup mnogi ti se put pred očmi počne zmekavati.

Nekteri tam pajdaši nigdar niti niesu senjali. Tie pajdaši niti su senjati šteli a niti su te znali, jer na prvomu im je mestu navek bile te da čem več i čem bolj se bi hitili na pravoga posljeka. A za te drage nam pajdaše nigdar nie bile senje moči pripeljati k srčeku im, te je une kaj se porihtati nigdar nie dale. Da nam ljepe h življenju biti – te zaistinu vsi šteli bi. Zaistinu bi bile dobre znati i te – e te življenje zaistinu i je, a te nakaj je čist drugač. Unda gda najmenj se tomu ti nadaš, gda se najbolj pririhtavaš da neš brig h življenju mel – nekaj te unda hpiči i neda ti da bi na miru bil.

Kak življenje gledeti i kak se poljek življenja hitati, vse te štel bi vsaki med nami znati, jer same tak nie dost gda se počne spremišljavati otom kak sme zanavek, a zanavek biti nemreme, jer vse na svietu kaj pozname ga - dobu svoju ma. Dihati ti, male po male, nie ljehke. Štel bi zdehnuti si poštene, a niti te ti nejde, jer kak god da gledel bi nekaj male bolj, iste tak ti vse te skup ziti niti nemre drugač nek je davne zapisane bile.
Potepel se mnogi med nami, te se i den denes dogodi, mnogi su se popetpli prie nas, a mnogi te iste tak zbeči neju mogli. Vsaki med nami kak god da štel čem bolj si h življenju bi, navek nemre na pravu se stran obrnuti. Une kaj ne vriedi prie ili kesnejše vsakoga med nami i počaka, pak ak pririhtal se praf niesi ili nie, vse mu te drugač niti ziti nemre nek tak da se popiknul bu čist – skroz na skroz.

Postekljal bi mnogi med nami, jer ljehke nie gda pravicu ti čeju zeti, gda uni kaj drugač ih niesi mogel zestati nek kak naopačne, mrčnjake ili krive nasajene, gda tie i takvi čeju se prodati vsemi kak uni kaj najbolši bi triebali biti. Da se vsaki med nami proba male i h špigljeku pogledati, mnogi bi mel kaj i za videti, gda se lafra ta dene hnadol mnogi niti nebi šteli pogledati une kaj tuj ostale bi. Da se vsaki med nami več če pospominati z pajdaši, da če i srčeke si posluhnuti, nebi mu se bile mogle dogoditi te da su mu vse druge vraštve bolše od unoga vraštva tere bi triebale vsake vrace otprieti.

Pohital bi mnogi put vse te skup, tak da ga nekteri natramajnjaki nemreju prijeti, nemreju gledeti i nemreju stanoviti. Došle ti tak bi te da vse pohital bi, da vse kaj pod ruku ti bi došle nič na svietu zastanoviti nebi ti mogle, jer zastanoviti se neda nič kaj krive je nasajene. Kak god da pohital buš prie ili kesnejše une kaj je triebale ili une kaj triebale nie, več te nebu nič natom mestu mogle držati. Prie ili kesnejše, kak god da te razmeti ti mogel neš, došle ti bu da moraš se z mesta genuti, da prejti ti je trieba i vse napraviti da bi se počinul čem prie. A unda gda počinka ti dost bu, videl buš da vrieme ti je da se geneš, da male pogledaš oko sebe i da se popeljaš. Popeljati se je več put trieba, jer trieba je mala po male i nekam prejti, trieba se je male po male posmeknuti, tak da ti jemput za navek dojde doba na une meste gde triebala dojti je.

Hjutre se buš moral sam z sobu zestati, hjutre ti več nebu bile bežati moči, hjutre se buš moral obrnuti na pravu stran, moral buš pajdašem bližejše dojti, prie ili kesnejše, moral buš im povedati da krive si prešel, da skrenul si, da vrnuti štel se bi tam gde praf vse nasajene je.

Dojde ti unda da si na pitanje – e moči je od senjah živeti, ti, kak god te bi i štel, nemreš več niti odgovoriti. Vsikud ti tumačiju da same penezeki une su kaj vriedne je, da same zanje i vse zanje trieba je napraviti, a po druge strani dobre ti poznate je da niti ž njemi vse moči ti oddelati nie a iste tak ti je poznate da z penezeki srečicu kupiti se nemre.
Živeti od senjah, moči je – ak srčeke maš, srčeke kaj nič ga nemre potrieti, kaj nikomu se potrieti neda!