Piše: mr. sc. Rajko Fureš dr. med.

Oprostiti trieba i gda ljehke nie, te ljehke nie ali je moči. Druge nam je morti moči ali se iste tak smele nebi. Prešle je, denes kak da hčera bile, pak nič ne razmem, kaj se te prie dosti vudenki dogodile, kaj i zakaj. Za tie cajt, kaj i nie tak več najkrajši, čude se toga več je poteple a husebe dobre poznati morem da mogle je vse pune bolj ziti. Vse te skup kaj se gliboke prijele, kaj se poteple hden a nie se potepsti triebale, vse te skup dopelale nas je do toga da denes nikak moči nie za razmeti – a kaj te bile je, zakaj se pripetile une kaj nie same tak za razmeti. Te kaj razmeti te nemrem, te po druge strani nie te da ne razmem. Denes razmem dobre kaj je i zakaj bile, ali iste tak po druge strani razmeti pak nemrem razmeti te zakaj se je zločica zavljekla tam gde nigdar triebala nie, pak je k sebe zela une kaj nigdar pripadati je nie triebale.

A življenje navek poveda da nesme se stati, da navek se mora dalše iti, da nigdar une kaj nie vriedne husebe se nesme držati. Zločica se nesme nigdar k sebe zazavati, nesme se nigdar od sebe une dobre odtirati, jer tak se jedine mora sam ostati. Zaistinu te tak je, zaistinu drugač se niti nihči med nami vladati nesme, jer same za navek nam more biti i ostati jedine srčeke najčistejše. Vse une kaj naopačne je i kaj nie hvredu nasajene bile, jake teške na pravu stran ziti more, bolše je te povedati tak da naopačne ak pregliboke hgrezne več nigdar na suhe nemre dojti.

Tak, i unda gda najmenj te vsaki med nami štel bi, i unda gda morti bi i pobegli od vsega toga proč, navek vse te skup i nie te same tak, navek se vse te skup nemre furt spelati same tak kak bi si te i šteli. Još jemput se bum vrnul na une kaj bile je. Te povedal bum zate kaj za vse veke štel zaprieti za sobu bi te vrace, vrace čez tere me pikale je i piče. A pikale me je pune toga, pikale me je vsu tu življenjske droptinje, droptinjiče kaj same zaskaljile bi vse nas sikud. Dok se zmišljavam kak nie ljehke bile, teške je ne povedati da ne zločica mesta h srčeku smela meti nebi. I pak nie same tak posmeknuti se od toga da kuražu bi štele se, nie same tak se obrnuti, nie same tak hpreti se i zdržati unda gda najbolj bi te odvlječi naopačne štele.

Teške je pozabiti, još je gorše unda gda zločica ti se pripeti od unoga teroga si mel za najbolšega pajdaša, teroga si h zvezde hkival, teri ti je najbolji od vseh na svietu bil. Kak god je da je, najgorše ti je gda najbolši pajdašek ti pleče obrne. Najgorše ti zaistinu unda je, gda počkalji te unie od teroga se te nigdar nadal niesi a ni nebi. Vse te skup dok rastumačiti si bi štel, nikak se otrgnuti nemreš od toga da boli te. I kak god da vsaki med nami štel bi vse te pred ljudmi kak unie najkuražnejši odtrpeti, po druge strani vsejedne vse ti te skup navek i je, navek ti se vse te skup nemre pod komandicu i meti. Isti tak ti je i za razmeti te da nie ti same tak unda gda te pičeju, i kak god da sam štel te i bi, kak god da nemreš odtrpeti vse te skup, po druge strane nemreš i nesmeš se vrnuti. Une kaj prešle je - prešle je, prešle je i vrnuti se več nigdar mogle nebu. Zate trieba je živeti, nikak drugač - jedine tak. Po druge strani iste tak znati moraš da i drugi živeti triebaju, da kak god da su ti zločicu napravili, iste tak dobre ti znati je da nesmeš nigdar drugami zločicu šteti. A zločica navek je same zločica, ak nekomu ju želiš ili ak te bila i zločica je najmenjša, niesi nič bolši od uneh kaj tebe zločicu su šteli ili napravili.

Pravica, srčeke najčistejše, vse une kaj sme si k srčeku zeli, vse te skup nemre drugač biti – more biti same unak kak jedine je i trieba.

Da nie ljehke i da nie same tak unda gda misliš da vse se je obrnule, vse te skup te nemre zvlječi, a bormec te nemre niti obrnuti ak se sam nečeš obrnuti. Kak god da skrenul si i kak god da naopak si prešel, moreš se zvlječi, moreš se na pravoga puteca vrnuti, same te nie moči drugač nek klečečki. Ak tak štel bu vsaki med nami, ak iste tak molitvicu bu kak une najvrednejše na srčeku nosil, unda nebu teške povedati a niti posluhnuti – oprosti mi pajdaš, unda gda te najlježejše i nie. Tak sme nahčeni i drugač niti biti nemre, drugač se h cielom življenju niti vladati nesmeme.

Oprostiti je trieba, trieba je pajdašu pak ruku dati, da vrnul bi nam se na putec jedini, da dušica mu od zločice se ščisti.