Piše: mr.sc. Rajko Fureš dr. med.

Unem pajdašem kaj žalosni su i kaj dobre im nie - kaj največ trieba? Trieba im je rieč domača, rieč najtoplejša i pajdaška. I vsaki med nami, prie ili kesnejše bu do toga došel da od žalosti pobeči mu nebu moči bile.

Unda gda niti senjal niesi da nekaj te mogle bi na krivu stran življenje otpeljati, hutu te je dobu, unda gda najmenj si tomu se nadal, nekaj hpiknule. Mam si se našel tam gde do male prie niesi niti senjal da mogel se najti bi, i vse si se pitati počel kak si te dopeljal se z vsem tem skup tak i tam od gde se nemre niti nič druge praf videti. Pak, zaistinu kak god da niesi nič hutu dobu razmeti mogel, iste tak štel si da čem prie si rastumačiš vse te skup, da mogel bi otprieti une kaj niesi nigdar mislil da otprieti ti trieba bu.

Kad god štel buš pobeči da nebi videl i čul – posluhni i poglej! Posluhni i poglej vsikud i vsaki put ak dojdeš tomu blizu, gde vidiš da ljudmi ljehke nie. Poglej i posluhni, jer morti bu zutra iste tak i tebe žmehke i morti i ti triebal buš, kak i tie pajdaši denes triebaju. Morti nie praf povedati i te da i tebe triebale bu, bolše bi povedati bile te da vsaki med nami, pa iste tak i ti, lježe bi prebavil zločicu ili nekaj kaj morti te naopak vlječe, ak nehči je ili poljek tebe bu. Lježe je i lježe bu, nikak drugač i nigdar drugač, kak god da se obrne ili kak god da vlječe te, vse te skup same na jednu stran se deti more, jer doba je ta jedine, doba je ta srbljiva, doba je ta navek žmehka. Kak sme, ne jemput posluhnuli, te da nigdar pod sunčekem ljehke nie bile, tak i vse te skup zide nam navek tak kak zide – nigdar praf i nigdar ne unak kak vsaki med nami se nadal je. H glave vsaki med nami navek nekaj druge če, navek nekaj druge premeče, navek bi na drugu stran krajil, navek bi mu se obrnule unak kak smel se nie obrnuti.

Moreš denes vsikud videti te kak ljudi same poljek prejdeju i kak nigdar se niti ne obrneju, a h iste vrieme se vse te skup niti nemre drugač otprieti i drugač potrieti, nek same tak da pred nekoga skočiš. Morti se bi nehči huti cajt i zlecal, ali une kaj iste tak zbeči se nemre je te – da ovak ili unak, največ bi ih male prešle nazaj, pak se bi genuli h stran i brže bolje prešli proč. Mam, čem se bi im prilikica hkazala, hmeknuli se bi i buju, čem prie i čem fljetnejše, da nehči ih videl nebi i da morti nebi komu pomoči triebali. A tak došle je, tak denes te vse skup vsemi kak najnormalnejše postale je, jer kaj druge povedati nek te da človek se na podu frče.

Zaistinu mu nie najboljše, jer drugač se nebi na podu zvijal i frkal. Poljek njega vsi skup ideju sim pak tam, skore da se nihči po njem niti ne obrne, a još menj se najde uneh kaj k njemu bi skočili i kaj pomoči šteli mu bi. Tak te je došle, tak da nihči po nikom več ne gledi zate da pomogel bi mu, največ ih po drugami gledi same tak da nekaj bi im pritisnule se ili ih hkanile se. Takve je tu stanje i takva je te doba, drugač se niti nemre otom povedati, jer nemre biti nič drugač praf, ak se ne postaviš unak kak te trieba je. A une kak je da je, une kak triebale bi, vse te skup nie zapisane od denes, te zapisane je od gda svieta je i veka, vse te skup zapisane je od unda gda se drugač niti nie mogle zapisati. Te od une dobe je gda se nie nič drugač niti oddelati dale – nek tak da se je jemput za vse vrieme povedale i vsemi prenesle kak istinica jedina. A te kaj je praf, vsi skup znati bi triebali bi, vse te skup nič druge niti nie nek jeden jedini, najmilejši Jezušek nam. Kak god da ljehke Mu nie bile, kak god da i une najvrednejše Jezušek nejmilejši dal je, dal da vse nas spasil bi - nigdar nie pozabil. Navek Mel je cajta za dečicu svoju, navek je bil poljek vseh uneh kaj trieba pomoči im je.

Zate i vsi mi skup, navek, triebame biti poljek uneh kaj trieba im je pomoči, navek triebame biti poljek uneh kaj žalosni su, navek se triebame puta pravoga zmisliti, jer drugač niti sme nahčeni a niti moreme iti.