Piše: mr.sc. Rajko Fureš dr. med

Kak god da navek su nam na pameti, dela miosrdna niesu same une kaj zapisane je, te su dela tera trieba živeti je, na tere je vsaki dnev misliti trieba, jer drugač niti moreme, a niti bi smeli živeti, kak god da sme je i bume na svietu kaj zname ga.

Povedal bum Vam vsemi kaj sme ne jamput čuli, a te je da lačnoga nahraniti trieba. Te ne veli se za unoga kaj od debeloče puknuti če pak je furt lačen, te nam poveda za unoga bogčeka kaj več se ne zmislji gda si je kaj pogutnul h putačicu.

Gda se veli da žejnoga napojiti trieba te iste tak nejde une kaj vsaki se dnev nacejaju i kaj se zibljeju se sim pak tam. Te triebale vsemi nami same jedne bi biti, a te je te da se unomu teri je najžejnejši nekaj za istinicu - praf, da žeju si shladi. Te da nehči je lačen i žejen - te nie same tomu spodobne da trieba se je najesti i napiti, te na prvomu mestu nam iti za tem trieba sit biti pravice, dobrote i vsega unoga kaj vsaki človek triebal bi h glubline srčeka navek nositi. Vsega toga dobričkoga žejen nihči med nami nesme biti i navek se tuj vsakomu „žejnomu“ na pomoči najti triebame.

Oblječi unoga kaj obljeke nema, iste tak trieba vsakomu med nami biti nekaj kaj same po sebe bi najjasnejše biti triebale, kaj vsaki razmeti triebal bi. Te pak iste nie te da unomu kaj zaistinu trieba da se une kaj nehči h smetnjak najrajši bi hitil, a sam se pak tak rashitavlje da vsaki dnev nase drugu obljeku nahitavlje. Triebale te bi biti te da vsaki med nami podeli une najvrednejše z unem kaj nema i kaj največ mu trieba je.

I putnika prijeti nie negdar same tak, a triebale bi te biti une kaj se same po sebe razme. Ne verjem da se mnogi med nami našli niesi hutom momentu da niesu meli kam, a da na putu su se našli, pak su iskali gde gdo bi im pomogel, a da največ cajt na pomoči im se nihči nie našel. A pomoči je trieba, navek i furt, te zaistinu ljehke nie, ali te tak jedine biti i more. Pomoči i same pomoči, jer i hutom momentu gda nekomu pomoči je trieba, gda putnika trieba prijeti, primi ga, primi ga kak da je Jedini ti došel k tebe je, kak da je te une kaj največ za vsakoga med nami napraviti moreš.

Vsaki med nami razbečati se more a i razbetežal se bu. Iste tak vsakomu se more dogoditi da zapreju ga, da friškoga zraka si žiti več mogel nebu - e te bile bi ili bu radi toga e je gdo krif ili nie krif te zdaj nekaj je čist druge. Une kaj trieba je povedati i ne same povedati je te da trieba je do svojeh ljudi držati, do vseh uneh kaj nekaj trieba im, tak i do uneh kaj betežni i kaj zaprti su. K njimi trieba dojti, ž njimi se trieba pospominati, njim je trieba pomoči i pokazati im da do njeh se drži.

Kak najsvetečnejša knjigica poveda da unoga kaj h robstvu je osloboditi je trieba. Denes se praf za praf pri nas teške najde nekoga teri bi za roba iti mogel, ali je denes došle vrieme gda je male modernejše vladanje tere bi nam na iste dojti mogle. Došle je tak vrieme da ljudi zabadaf delaju, da zate nič ne dobiju i da se do njih nič ne drži. Vsi skup se bi ljudmi triebali obrnuti, do njeh držati i zanje stati.

Vsaki med nami iste tak sam ostati more, kak h življenju tak h najzajdnejšami cajti, tak da nie smeti nigdar dozvoliti te da se ne pomore unda gda najtežejše je, gda nehči sam betežen ostane ili još gorše unda gda sam nemre praf se niti pokopati jer nikoga mu nie. Tuj trieba je iste tak pomoči, tuj trieba je pokazati da mame nekaj dobroga h glubline.
Dela milosrdna morti denes niesu une kak se veli najpopularnejša, ali ta dela milosrdna drugučka biti ni nemreju nek su je. Dok bu vseh nas na svietu kaj pozname ga, dok se bume za decu Jezušekovu zvati šteli - drugač nikak niti vladati se nemreme nek tak kak Najvekši nas je vučil. Nemre se jedne povedati i delati tam gde bi nam molitvica na prvomu mestu triebala biti, a po druge strani iste tak se nemreme mam spremanduriti i naopak krajiti mam čem čez te vrace koračneme, te je jedine kak zaistinu biti i trieba.