Piše: mr.sc. Rajko Fureš dr. med

Ljehkoga nigdar bile nie, nie bile te kak se po pravice poveda niti doba a niti je zate nehči trgati se štel. Te tomu je zorije, jer drugač niti nie bile moči dok pri tom vsi skup sme zmeknuti se negdar šteli. Nigdar bile nie tak da se nie mogle, e se je mogle napre ili se je morale nazaj – te nakaj je čist druge, ali retke gda se same na mestu stale.

Meli sme cajte iste tak, priznati si triebame, da zgledele nam vse te skup je kak da na mestu se stoji, pak je vse te skup zišle vse jedne tak kak su i mnogi se zaistinu spremišljavali dok su se same zase borili. Tuj nič mnogi put nie moči, tuj se niti ne splati drugač spremišljavati, jer spremišljavati se same tak h življenju neda. Spamtiti se tak moreme, da tie za tere je zgledele kak da na zemljice same stojiju, da su same pravu dobu čakali da z ljetrikicami i penezeki hvujdeju i vse druge kak bogce pustiju. Glavne im bile je te da njihove su riti bile im pune i da prepune buju im bile i dalše. Življenje pak nie nič druge nek življenje, za navek i navek je tuj, od navek je – a za navek vse jedne, na ovom svietu i nie. Za navek življenje same na onomu svietu je, same po Jezušeku moreme hunjega dojti, same ak sme si z Jezušekem, najbolši, ak posluhneme ga i ak sme pajdaši mu.

Pajdaši bi več si put na svietu triebali biti, još bolše je povedati da furt i navek te triebali bi biti, da niti se do toga nebi smeli dopeljati da nekaj drugač si spremišljavame. Nigdar ljehke nie bile a niti bu iste tak. Iste tak niti živeti ljehke nie. I morti nekteri kaj po svietu hodiju i moreju povedati da ljehke im je, jer su si nekaj pribermali, na drugu stran nie tak. A i tie kaj tak povedaju, povedaju tak jer im je nehči nekaj dal ili sami sebe moreju povedati da ljehke im je jer bez mukice su došli do kupčeka. Kak god da toga ma, iste tak ma još več uneh kaj ljehke im nie, kaj trieba im, kaj našu pomoč šteli bi. I tak pak do toga dojdeme – da pitanje si postavime, e sme vriedni po svietu hoditi, e igdar pogledame po vsemi kaj im ljehke nie, e se za temi ljudmi igdar obrneme da pomogli bi im. Verjem da odgovor je navek i največ put same takef da pred vsemi sram nas triebal bi biti. Največ put sami sebe hlovime kak same nase i zase delame, kak nihči nam drugi nie vrieden na svietu, kak jedini sme sami sebe vriedni.

Hlad vsemi nam diši, najlepše nam je gda legneme si i gda se pustime senjam na probu. Tak se lepe bi mogli mutiti, mogli bi se zgubiti da nihči nas ne vidi, mogli bi vse skup delati – da nikomu triebali nebi nič povedati otom kak vse te skup zgledi i kam te vse skup pela. Da morti vsaki med nami more drugač, da nie vse tak po pravice kak sami si o nečem spremišlavame, kak drugač vse te more se oddelati nek ovak kak nam i je. Zate je navek trieba pogledati male oko sebe – vse ti te stoji i zgledi vse jedne tak kak zgledi, pak niti rezmel neš kak vse prejde, kak vse se spremeni, a tebe zgledi tak kak da nič nie se dogodile, kak da vse stoji. A da trieba je drugač, da trieba je po pravice, te je une kaj jemput, prie ili kesnejše trieba si priznati. Vse une kaj vsaki dnev delame, ščem se mnogi put zestajeme, vse te skup same pripelati more vrieme kaj dojti nam trieba.

A tu vrieme od navek se čakale, čakali su ga unie prie nas, čakame ga mi kak buju i uni kaj poklje nas dojdeju – čakali ga. Tu vrieme vsemi nami donesti more dišobu, mir ili pak vse skup krive i naopačne. A nam vsemi same trieba vrieme prave, vrieme kaj za vsakoga mele bu mesta, kaj vsakoga posluhnuti bu štele, kaj vsakoga triebale bi podragati. Tu vrieme, vrieme je za pajdaštve, vrieme je za veseljiče, vrieme je kaj meli ga bume jer Jezušek nam ga je zaslužil, tu vrieme je vrieme kaj nie ga same tak