Piše: mr.sc. Rajko Fureš dr. med

More sim a more i tam, vsi skup niesme jemput same skrenuli, i kak god da skrenuli sme iste tak se z vsega toga nahčili nič niti niesme. Nejlepše je gda se pajdašu smili i gda se neda nikak z stolčeka premehkoga. Skrenuti je najlježejše, pune težejše se je vrnuti, ne same zdej – te teške bile je kak prie tak i denes.

Teške je vrnuti se, teške je i preteške, jer gda te otpelja na opak vsa ta zločica tera je stobu stepla i tera te je dopeljala na put po teromu si unda ljehke skrenul, tak da niti ti ljehki putec nie tie teri te vrnuti bi triebal. Več ti niti nie na pameti nič pametnoga unda gda si se gutiti počel, a sam te videti niesi mogel. Iste tak ti več nie niti do toga da na pravoga puteca vrnul se bi, jer putec ti nie ti več na prvomu mestu.

Ljehke kak nam biti more, zdej, zutra ili neznam gda, vse te nas pelja nekam kam niesme do hčera si mogli misliti da došli tuj bume. Unda gda se skup staneme i gda se obračati bi šteli, unda nam vsemi skup dojde do pameti una starinska popevkica – popevkica tera dela i tera vsemi nekaj bi štela i povedati, a povedale je i poveda furt same une pametne.

Popevkica ta poveda da trieba je do ljudi držati i za ljude stati, poveda da jedine se splati za človeka živeti. Dok još ti h vuha popevkica ta zvoni, dok misliš si da lepše od nje nigdar čul niesi, nemreš a da ne spamtiš se kak nekaj vsejedne ti fali. Niesi si tak mogel do hčera niti misliti da tuj buš gde si je, da več put ti dogodile bu se da se zestati nemreš niti sam z sobu.

Unda ti niti nemre drugač ziti, nek tak kak zišle je, da je jedina i prava doba h življenju človečkom – te kaj se je negde stisnule i kaj nie dale nič druge – nek da tuče i piče. A kaj, kaj kaj, je ti se morti male i zbudile une kaj si do hčera štel skriti nekam gliboke, je te morti male i prijele, je ti male i otprle vse te skup h življenju, doba ta kaj nie ti nič druge zeznati štela, a nič druge mu se dogoditi mogle nie.

Bogi siromaček, kaj buš z sobu, gda več mobiteljeka, ljetrikice i stolčeka ti nebu, kaj z sobu buš unda napravil. Dobre se moraš spririhtati, da se ak več nekaj se bu dogodile – ne spustiš nek da se mam h još vekšu ljetrikicu hitiš i da ti je kolubarček još debši. Tak se bi triebal ponesti, jer nič ti druge zaistinu praf nebi bile, jer kaj ti bi ljudi povedali da te zdaj tam vidiju hune ljetrikice male i stare.

Kak god med ljudmi nie več put za študerati otom kaj se more zgoditi i kaj bi zaistinu i triebale, iste tak nie same tak gda triebaš se zujti i prejti na une kaj sam sebe štel bi dopovedati kak une kaj vsemi na pomoč triebale bi biti. Da ti je ljehke, najdrajši nam pajdaš – ljehke ti nie, ljehke ti još bolj nebu, jer dok tak ti se je smiljile na mehkomu stolcu sedeti, dok si se nahčil na te kak ti delati nič nie trieba – a vsi te skup dvoriti bi triebali, iste tak ti bi vse te skup još bolj ziti triebale same na jednu stran, a ta drugačka biti nemre nek su ju i nasadili.

Da more se drugač – more, da se štele drugač – i te morame po istine povedati – nie. I unda gda se bi štel človek pitati e su penezi zaistinu najvrednejši h življenju, e je najvrednejše te da si na mehkomu stolčeku sediš, e je trieba vse na svietu kak Juda odhititi same da se na stolčeku ostane – te je pitanje kaj more meti več toga za povedati.

Nekteri ti kažeju, a ma ih vse več, da same sebe si najvrednejši, da vse skup druge trieba dotreči. Ak pak čeme držati se navuka poštenoga, kaj Jezušek nas navek je vučil, h življenju same jedne napraviti morame, a te je da morame biti pajdaši, da vse za pajdaše dati triebame, da stolček i ljetrikica ne vrediju nič dok se o pajdašem dela, jer pajdaštve i pajdaši od vsega najvrednejši su. Te nigdar pozabiti se nesme, jer niti več nam vriedne živeti nebu.