Piše: mr.sc. Rajko Fureš dr. med

Živeti nie ljehke, nigdar bile niti nie - a iste tak niti te i bu. Tak te je, vsaki med nami te si more rastumačiti i te more razmeti. Po druge strani iste tak vsakomu med nami more i ciele živjenje prejti a da nič razmel nigdar niti nebu. Ljepe i ljehke nigdar nie išle pod ruku, kak se veli.

Te šteli su mnogi, te si nie jeden med nami pribermati štel - ali išle vse te skup nikak im nie, jer niti se neda življenje drugač posložiti nek tak da same nekteri maju a vsi drugi nemaju, ili pak tak da maju jake male.

Nie tomu toga dugi cajt da su nekteri šteli, bar su nam tak povedali, da vsi jednaki bi bili. Tak su nas i dugi cajt vučili, tak sme se mnogi cajt hlovili kak sme skore i sami verovati hute počeli da vsi bi jednaki morali i triebali biti, da te najbolše je. Dobre vsi mi skup zname kak je vse te skup za istinu praf za praf zišle, kaj je z vsega toga same velike nič se steple. Uni kaj največ su nam povedali i kaj su nas navek vučili da bi si kak brati z vsemi na svietu triebali biti, da vsaki med nami triebal bi meti unuljike kuljike mu največ je i trieba, tie dragi pajdaši su se prvi nametali unda gda je do preokreta došle. Uni bogčeki teri su do zadnje vure mislili kak tu vrieme kaj h miru i veseljiču su bili - za navek bu trajale, još i den denes ne verjeju kaj se je te zgodile. Tie dragi pajdaši kaj su navek jednaki bili, bar su tak pred vsemi povedali, denes su nam zaistinu pravi, najbolši i najmilejši gospodarstveniki. Pajdaši tie se denes iste tak boriju da vsi bi meli, ne več tak kak prie, denes male drugač, tak da po tom kak se vladaju vsi maju jednak - male, a uni maju i meti triebali bi kupček najvekši.

Zakaj h ovu dobu pak dojdeme na nekaj kaj bile je prie skore dvajset let, morti mnogi bu povedal da te več je za vse veke prešle, da nie trieba več pehati po unomu kaj prešle je. Morti se bi i mogli z vsem tem složiti, ali iste tak une kaj trieba je sebe i vsemi povedati, da vse te skup nie praf bile i niti praf ziti nie niti mogle. Još je gorše, a te iste tak najbolše govori same o sebe da unie kaj su se do hčera, a mnogi i den denes, h zvezdicu najčrlenejšu zaklinjali se, denes več ne misliju nate kak vsi jednaki bi biti triebali i kak vsaki med nami živeti kak človek triebal bi. Te trieba je povedati zate da ljudi bi se spamtili gdo je gdo, gdo je bil gdo do hčera i gdo je gdo denes. Te je trieba da se bi vsaki med nami mogel pogledati huse a iste tak da se bi vsi mi skup jedni drugam mogli h uoči pogledati, jer unda nebu moči gledeti i lagati. Lagati je moči, moči je i dugi cajt, ali prie ili kesnejše hlovi se vsaki kaj h laži i z laži življenje si zmeša. Lagati je moči, a vsaka laž za navek zdržati nemre, te je zaistinu jedina pravica, same nie pak dobre da laž z nami pre duge krmani, jer preveč bi toga hništiti mogla.

Da laži i naopačne niesu vriedne, da najvrednejše je človek biti i pajdaše prave poljek sebe meti - te je une kaj nema cene a niti pred njem h življenju nič biti nemre. Zate i ta doba trikralska vsemi trieba pomoči da poveme si po istine - gdo sme je i kaj od življenja čeme, e su nam na prvomu mestu penezi ili zaistinu i za pajdaštve nekaj bi h življenju dali. Da te denes nie pre popularne, da vsikud se denes za peneze ljudi hičeju, tak da mnogi put nemreš nič druge niti povedati nek da ti je vse te skup naopak nasajene. I unda gda dojdeš do toga, e i ti tak bi življenje si porihtal, tak da na prvomu mestu same peneze bi del. Unda ti drugač niti nemre ziti nek tak kak je zišle, a zišle je po istine naopak.

H uove vrieme zate nam je trieba male se zastanoviti, sami sebe triebame povedati da kak god da bez penez h življenju nemreme, iste tak nam tie isti penezeki nesmeju vse h življenju biti. Vse nam trieba biti človek, pajdaštve i une kaj nas jedine more človeku prispodobiti - a te je vera jedina. Te je put jedini, putec kaj Jedini nam Jezušek kak dar najvekši je dal - darek da vsi mi skup nove bi življenje zaslužiti mogli.