Piše: mr.sc. Rajko Fureš dr. med

Nič vrednejšoga nie poznate od človeka i od srčeka kaj jedine ga ma - najčistejšoga. Ak srčeke mu zgubile se je, ak se je nekam stran hputile, vse te skup ti same more na krivu stran prejti. Još je gorše ak do pajdaštva ne držiš, ak ga h stran hičeš i ak se na njega niti ne zmisliš. A o pajdaštvu, kaj otom povedati, e vriedne je, e moči je, e se splati. Te je une kaj i ščem se štel bi vsaki med nami dobre potfutrati, da ga nekteri tam mrčnjaki nebi stepli. Drugač se h življenju niti nemre, nemre drugač niti biti nek unak kak nahčeni sme po pravice.

Kak sme nahčeni – nate denes pozabiti se bi štele, mnogi cajt. Nie ljehke držati se puteca kaj ljehki nie, vsaki med nami morti bi i negdar štel se zmeknuti, jer navek se fljetnejše zmekneme prek do unoga kaj se nie mogle. Ne jemput, mnogi med nami se popikne, nigdar h življenju nejde ti tak kak si te vsaki med nami štel bi. Kak god da se vsakomu poslu ili zločice pririhtaš, dogoditi ti se zna mnogi put da te vse skup te hvrikne i da dojdeš dotoga da neznaš se veči niti nikam obrnuti.

Kak god da nečeme si vsi skup te priznati, vse h življenju prejti mora, vse kaj negde se zvaljale, na druge strani putec si bu kraju pripeljale. Tak je i drugač na svietu nemre biti. Nič dobu svoju nemre prehititi, jer vsaki ma vuru svoju kaj navita ga je počakala još dok si su ga vsi čujti mogli kak se po prvi put zabečal je. Nasmejati ti se navek trieba dok pajdaše pri ruke maš, dok pajdaši su pri srčeku ti, jer nigdar te razmel neš ak niesi si življenje tak porihtal. Nie same tak pajdaša zgubiti, z tem se vriedne nie igrati, otom nie vriedne nič niti povedati – ak se ne porihta vse te skup unak kak je te najbolj, unak kak te praf je. Za pajdaštve se človek cieloga života trieba boriti, jer pajdaštve je une najvekše kaj življenje vsakomu med nami da. Pajdaštve se kupiti neda i z pajdaštvem se nie vriedne igrati, ne splati se pajdaštve hništiti i pajdaša zgubiti, jer več ih mel nigdar neš i več ti vrnuli se neju.

Pak, prie ili kesnejše dojdeme do toga da vse mora prejti a i da prejde, kak god da vse te skup vsi mi šteli mnogi put i nebi, pomoči tuj nemreme si. A dojde nam prie ili kesnejše vse une od čega sme bežali, dojde i prejde. Dojde i une kaj sme šteli, a iste tak dojde i vse une kaj naopačne je i kaj šteli niesme. Vse te zaistinu i dojde, ali je iste tak istinica jedina i najvekša da vse te skup i prejti mora. A kaj ostaje, ostaje same jedne, jedine i navek prave – pajdaštve. Prave pajdaštve niti kaj hništiti more, a niti se une same tak da potrieti. Mnogi si te nigdar priznali neju, mnogi te razmeti niti nemreju, ali je jedine te kaj ostale bu, jedine je pajdaštve vriedne, za pajdaštve je jedine živeti trieba, jer ak pajdaštva ti nie, ak doma ti nie, ak blagoslova Bogeka najdrajšega nad ženjsku, dečicu, mamekem i tatekem ti nie, unda vse druge h življenju nič ne vriedi ti. Moreš se z penezeki nahitavati, moreš si i dušicu za nje prodati, moreš se ž njimi mutiti i za kratki cajt pozabiti na vse une kaj vriedne je. Ali prie ili kesnejše došle ti bu do toga da več ljetrikice ti nebu, da več nebu niti penezekeh, da neš prisebe mel niti telefončeka a iste tak da niti pajdaše poljek tebe bile nebu. Niti bi mogle več pajdaštva i pajdaše ti biti, jer odhitil si ih na vse strani svieta, porinul si ih tam gde si misljil da več nigdar ih triebal neš. A vrieme se vrne, vrieme se obrne, une za kaj si do ščera klel se največ – denes več nečeš niti bljizu k sebe, a une kaj si odhitil od sebe – te bi pak k sebe prijeti štel, kak da nič dogodile se nie. A teške je zmeniti i popravka najti za une kaj hništene je i kaj je preveč potriete, a nie triebale biti.
Zate nič druge nam se nie h življenju trieba spamtiti, nek same te da pajdaša i pajdaštve navek poljek sebe trieba nam je meti, da vse za pajdaša i pajdaštve trieba se dati, da pajdaša i pajdaštve nigdar odhititi se nesme. Same se tak življenjski smisel more meti, same se tak more najti vse une kaj se h drugu dobu niti ne vidi, jer nie same tak videti te kaj ti pred očmi je, a ti kak da pred očmi mrenu maš. Same pajdaštve živi, same pajdaštve husebe življenje meti more. Ak nehči se za pajdaša dela a pajdaš nie, prie ili kesnejše bu se pred vsemi otkriti moral, jer drugač se niti nemre odvrteti vse te skup. Prie ili kesnejše vsaki se hlovi na i pri delu dok odgovora mu nie moči zbeči, dok se kak bludnik bez gač pred ljudmi če pokazati, a več nihči te razmeti mu ni nemre.

Jedine kaj vriedne je – te zaistinu same je pajdaštve, same une živi, same une vse zdrži, same une vriedi življenjske dobe, življenjske duhe, same se une potrieti neda. Potrieti ga se same more – ak sami te šteli bi, ak sami mu noža za plećami bi porinuli, ak sami bi sebe štrikeca za vrat obesili. Te more napraviti same un kaj dobre neče sebe a iste tak niti pajdaštvu si, te more same unie kaj niti nie pajdaš. Te nikomu med nami uzor biti nesme, jer same je pajdaštve vriedne i same življenjsku dobu z njem otrpeti moreme i triebame.