Piše: mr.sc. Rajko Fureš dr. med

Da je moči une kaj nie, vsaki med nami mogel se bi zastanoviti, mogel bi se obrnuti i mogel se bi vrnuti. Da je moči une kaj nie moči, vse drugač bi bile. Al moči nie moči une kaj nie moči. Vsaki si misli kaj si misli, negda dojde vse te skup tak i do toga da same po glave ti hodi te da najlepše ti je dok pri miru si, da same bi štel da nihči te ne dira i da se poljek tebe same gda gda zastanovi une kaj nemre drugač.

Na drugu stran moreš otom si gruntati tak da ovak ili unak vse h življenju nemreš oddelati, da vse une kaj si si nakanil prijeti – nigdar prijel neš, kak god da te štel največ i bi. Življenje svoje put ma, te niesu furt puti takvi da im se nebi znale od kud su se spuknuli i kam pelaju, te največ su put puteci kaj pri njih nie tulike zavojeke teri ti se bi najti mogli na krive strani, tak da skrili ti bi ljekhe mogli vse une kaj videti ti triebale bi i je. Po druge strani ak neš nekaj štel, ak sam sebe buš zapiral huse i ak se buš hital navek naopak - vse une kaj nigdar naopačne smele biti nebi – unda ti se bu zaskaljile male pomale. Unda ti mam vse une kaj nigdar dirati smel niesi – prešle bu najemput hkriž, tak da te bu same zvlječi odtud mogla meglina kaj za vse nas se smeje.

A trieba je šteti, trieba je šteti, trieba je meti srček tie zase, trieba ga je obrnuti, trieba ga je posmeknuti gliboke gde ni jedne zvite i zmešane vrace neju mogle zastanoviti une najbolše kaj vsaki med nami ma. A srčeke iste tak trieba je za vse na svietu meti, jer človek človek biti nemre ak srčeke za vse na svietu mel nebi, ak same bi zase ga žmikal, stiskal i skrival. Gda god tak moreš moraš napre iti, moraš se hititi na pravu stran, moraš se boriti i moraš se obrnuti unam gde drugač se obrnuti mogle i nie.

Tu vrieme vse nas čaka, tu vrieme neda se potrieti jer nie same tak nekam dojti i tam se postaviti da ti nekak štel zgledeti naopačen bi. Morti i neš dal da nihči te pogladi, morti neš dal zapravf i unda gda šteli ti bi putec pravi kazati, morti neš dal zapraf i unda gda ti se če male po male otprieti i prestrieti ti une najvrednejše kaj vsaki od nas i ma.

Preveč nigdar nemre se, te zaistinu je i tak, ali iste tak je još gorše ak sam sebe zastanavljaš i ak sam sebe napre iti nedaš, unda gda napre triebal bi, unda gda napre ti moči je, gda drugač niti smel ni nebi.

Da je moči une kaj nie nigdar bile moči - vse bi bile moči. Al nie moči une kaj nie nigdar bile moči - pak i zdaj nie moči. Te teške je razmeti, negdar si vsaki med nami kak bogček grunta i štel bi z te kože van se zmeknuti al mu moči te nie, kak god da te štel bi. Te tak je, te tak se prijeti trieba k srčeku i te se drugač nemre niti razmeti nek da je tak kak je, jer drugač niti nesme se nič niti napraviti a niti spelati.

A vrieme se zastanoviti neda, nigdar se niti nie dale zastanoviti, vrieme nam navek je išle unam kam sme šteli ali i unam kam šteli niesme. Te je tak, te tak trieba biti i te tak se same razmeti more, jer drugač se niti nemre odvrteti vse te skup, kak sim, tak tam, pak niti nemreš potrieti une kaj najmilejše ti je a da ti se pred očmi kazati ne počne same une kaj najfljetnejše je. Po druge strane navek dojdeš do toga da rajši se bi prešel nakam drugam mutiti skrivečki, tak da nie same tak se povedale otom da nemre preveč se – a nie se niti probale. Kak god da nemreš preveč zgutati, a zgutati se nigdar nemre več nek kaj ti h želučeka stane, življenje iti trieba, zastanoviti da i češ ga – nemreš. Tak ti za prav stoji da ak več češ nametati huse, vse te skup ti bu prejti mogle same od tud od kud došle je ili bu na drugu stran sprebile. Niti jedne niti druge dobre nie, vse hute te same vse te skup skalabuštriti more, tak da i une kaj ti je negdar najmilejše bile - na krivu stran se spreobrne.

Tekve ti je vrieme, vrieme je te kaj od navek takve je bile, kaj od navek je štele i kaj od navek je znale, negdar mlajše, negdar slajše, ali pune več put ne unak kak triebale je. Vsi mi skup navek čeme več nek moreme dobiti i najti, vsi mi skup šteli bi se morti i hvis deti, ali vsaki put nejde, bolše je te povedati da največ put se vse te skup na krivu stran spela i te je življenje. Te je une kaj te tira da navek pravoga bi puta našel, da bi mu vesel bil, da skrenul več nigdar nebi, kak niti smel nigdar ni niesi.