Piše: mr.sc. Rajko Fureš dr. med

Vsaki med nami sigurne si nie same jemput misljil otom kak nikak se nesme lucku ženjščicu pogledati. Još je gorše ak si bi kakvu bedastoču h glave gruntal o tom. Spremišljavaš se kak te je gda si zmučen, pak dojdeš domeka, gde tvoja te ženjščica mila čaka, pak se nemaš očem ž nju spominati.

Dojde ti tak da se namečeš, male potpereš pak unda hitiš se cieli h posteljicu, tak ste tak da kak god da zmučen si, h napad ideš, unak kak se veli bez da si kaj se pririhtaval. da mam več zase neznaš. A more ti dojti i

Da je furt h življenju ljehke vse nam bile i da ljehke navek nam se kazale bi, nigdar nam vsemi skup se nebi moči postaviti praf i nigdar nič se nahčiti mogli nebi.

Unda gda si spremišljavaš otom kak tebe najžmekšejše na ovomu svietu je – dobre ti znati moraš da ma pune več uneh kaj gorše im je nek tebe je i nek je tebe igdar bile, tak da se stanoviti ti trieba h vsaku unu dobu gda gundranje na pameti ti bi bile. Ne splati se same prebirati po unomu kaj se je triebale več h davnu dobu pozabiti, odhititi i dotrieči – tak da več nič od unoga kaj je za stapsti ne ostane. Življenje ma za vsakoga med nami svoje putece, za nektere se bi človek mam odlučil a za une druge sigurne da po njimi mu nogice nigdar hodile nebi. Une kaj si priznati morame, kak god da te šteli nigdar nebi – je te da putece moreme zaslužiti ali ih zabirati navek i nemreme, jer od navek je zapisane gdo po terom bu putecu išel. Druga je stvar kaj vsaki med nami more na pravoga se puta vrnuti, ak srčeke mu čiste je i ak se za življenje i putec pravi če i more zboriti.

Tak je jedine moči i razmeti vse une kaj dobre ti čeju i kaj se bi z tobu radi spominali unda gda te same njim trieba, a trieba im unda ga im gori. Tie predragi te niti su a niti te bi kaj pitali, još ti je gorše ak si misliš da pomogli igdar ti bi jer te nigdar oni niti nebi napravili, jer ovak same su zase i nase misljili si navek življenje ciele. Čem prie te tak si rastumačiš – tem prie bu lježejše ti. Za razmeti ti je i te, sigurne je unda i te da več te nebu pikale vse te skup, da mam mogel buš bez trdanjka h življenju živeti i da buš mogel vsikud se sprehajati a da nič te stiskale nebu unde gde te smele nebi.

Dok vsi drugi spiju ti čujti moraš. Dok se negde drugde morti po glavam nekaj lepoga i spremeče, tebe se same pred očmi črne misli kažeju, kak god da štel nekaj drugoga bi. Tuj bi se mele kaj i za reči, tuj bi se mogle male i sprekolubitnuti, a nie same tak se postaviti na vsaku stran gde se bi triebale zapičiti i spretrgnuti, jer drugač se niti nie mogle oddvrteti vse te skup. Jemput vsaki med nami štel bi same te da nehči ga posluhne i da pove mu da morti i rad ga ma. Iste tak vsaki med nami štel bi da se obrne vse une kaj drugač niti iti nemre. Jedine je moči te obračati vsikud unda gda se nemreš sam z sobu zestati i gda nemreš predrieti vse une kaj se je morti več od negda predrieti triebale. Une kaj dobre nam vsemi bile nebi je te da pak nam se hutom cielom cajtu vse te spretrgne i da nas zastanovi unda gda najbolj sme se pririhtali da bi spremenili vse une kaj vriedile nie.

Da ljehke nigdar bile nie i da življenje več se drži stranjskeh i naopačneh nek domačeh i uneh kaj nekaj bi šteli ti pomoči, vse te skup nam je same po malu se spotrle i povljekle vse une kaj nebi triebale z sobu. Niesme sami i niesme jedini kaj ljehke zdaj im je, kaj ljehke im bile je a iste tak kaj ljehke im bile niti nebu. Življenje takve je, kak god da pak češ da ti se vrne vse une kaj veseljiče ti navek nositi je znale, iste tak ti je vse te skup zišle tak kak se je nehči tomu nadal. E si te bil i ti, te nekaj je čist vse jedne, jer jedine je bile vriedne se otrgnuti vsemu tomu kaj te je štele zastanoviti, zastanoviti tak da nebi se obrnuli unam gde nekteri te videti morti šteli niesu.

Te kaj teške ti je, nesme biti ti kak beteg. Te triebale ti biti bi još vekše veseljče življenjske tere čem bolše si pririhtati vsaki bi štel, kak zase tak i za vse une kaj rad ih maš. Unda vsi veselejši i srečnejši bili buju, jer sam živeti nemre i neda se.