Piše: mr.sc. Rajko Fureš dr. med

Da nihči nigdar znal vse nie - te poznate je, da trieba navek se vučiti - tak biti bi iste triebale. Da une kaj neznaju nahčiti triebale - te iste tak stoji. Bez toga niti nemreme do toga dojti da reč Gospona našega vsi razmeti bi mogli.

Ak furt i furt poslušaš une kaj si osebe misliju da najpametnejši su, pak iste tak im na volju daš vse te skup, jer se zameriti nikomu štel nebi. Dopeljal buš vse nas skup – a ne same sebe, da poljek sebe meli bume „pajdaše“ kaj hništavali vse buju, a nič im se dogodile nebu. Te da morti vsaki med nami more nekaj i krive napraviti – te stoji. E te bile zate kaj dnev se krivi kaže ili je te bile zate kaj preveč sme se žurili pak nam se dogodile – te je une kaj je nekaj čist drugoga od unoga da naopačne se dela zate kaj se niti drugač delati neda. Da življenje navek more drugač biti nasajene i da se življenje drugač obrnuti more – te iste tak vsaki med nami zna. Da se te vsaki čas dogoditi more – te nekaj čist drugač za povedati. Pak iste tak povedati se trieba da vse te ne zide navek unak kak ziti triebale bi. Vsejedne za razmeti je i te ak se popikneš jer gledel niesi, ali na drugu stran razmeti pak nemreš vse te skup ak ti se zmekne naopak une za kaj mislil si da praf stoji.

Da nahčiti trieba je une kaj neznaju i znali niesu, te je une kaj navek trieba šteti je. Šteti te trieba je, jake, ne same tak da se same otom spomina, da se same grunta, nek se na prvom mestu jedine trieba furt same pune delati i ljudi pravomu navuku vučiti, kaj ljehke nie. Mnogi med nami, te trieba iste tak pred vsemi priznati, rajši prejdeme poljek i mučime, same da nas se nebi dotikavale nekaj. Navek sme vsi tak nasajeni bili, tak nasajeni da sme se rajši proč hmeknuli nek da sme se same male genuti probali, same da bi čem dalše išli od vsega kaj nam bi morti se preblizu dotikavale.
Pak, ak se navek tak vsi skup vladali bume dojti niti nemreme nikam. Nikak se na pravu stran pri nas nič obrnuti mogle nebu ak tak dalše išle bu, jer vse une kaj krive je nasajene niti se neda obrnuti unak kak po pravice te triebale i bi. Jemput, kak god da življenjski cajti bez volje poljek tebe letiju, jemput se moral vsaki med nami bu zastanoviti. Kak god da nie ljehke ljudem iti nekaj rastumačiti, kak god da se morti ne splati preveč potom pitanju ni pehati, na drugu stran bolše je prijeti se praf puteca kaj same jeden jedini biti more. Nič druge, kaj morti nam se h prvomu cajtu i bolše vidi, nič druge, kak god da lježejše nam se kaže, praf za praf – praf ziti ni nemre.

Kaj jedine se trieba povedati otom pitanju, same da se toga odogovora pravoga zbeči neda, kak god da mnogi te šteli vi. A tie navuk poveda da delati nam vsemi je trieba, furt i hude, ne same unda gda več nemame kam, nek zate kaj drugač se življenje niti posložiti nemre. Kak god da nebi šteli prejti nekam gde se bi morti male i rasteple tu vrieme kaj nigde ne greje, po druge strani same se moreš sam z sobu zestati, tak da nebi več znal kam.

Nahčiti une kaj neznaju, te je jedine praf, otom se zaistinu neda nič niti druge povedati, nek te da jedine te je tak i da jedine te je praf. Drugač se niti h življenju neda i nesme delati, jer h življenju nič se ljehke i same tak ne zasluži. H življenju se nič prek noči nemre preskočiti i neda se zvarati sam sebe a niti une kaj im se za pajdaša delaš. A lagati za navek nemreš, lagate nie moči Jedinomu – jer vse zapisane pre gliboke je. Prie ili kesnejše vsaki pred Najvekšega došel bu, klečečki, vsaki bu posluhnul dobre i une za kaj mislil je da je pozabljene. Kak god da se toga šteli spamtiti niesme, došle bu nam navek i jedine te kaj sami priskrbeli sme si je.
Človek zate biti trieba, po druge je strani trieba iste tak i puta pravoga vsakomu kazati, trieba je ljudi nahčiti da neju naopak se metali, trieba je vse dati da čem ih menj bu skrenule i naopak prešle. Na drugu stran ak vse te tak napraviš, ak se toga poštene primeš i ak volju bi vsemi skup pokazal najvekšu, unda ti bu morti vse te skup bolj i zišle, tak da i h cajtu gda klečal buš neš mel tulike toga kaj tiščale te bu.
A unie terami si kazal, tere si vučil, najdrajše ti bi bile da su nahčili se i da tak su se dalše h življenju praf i vladali. A volja kak volja i srčeke kaj neda se nikam obrnuti, te une je kaj nemreš nigdar i nikak hpregnuti, te je une kaj se neda same tak obrnuti.