Piše: mr. sc. Rajko Fureš dr. med.

Same molitva vraštve je najbolše, same molitva pomoči nam vsemi more, same molitva nam je jedina. Molitvica je ta kaj pela nas po stezice jedine, stezice kaj kak darek sme ju od najvekšega med najvekšami dobili – od Jezušeka nam našega najmilejšoga. Na molitvu nigdar se pozabiti nesme, nesmeme se zgovarati nigdar i nigde, niti stem da sme na nju spozabili, da sme morti z vremenem na knap bili ili da sme tak zmučeni bili da se z molitvicu niti niesme mogli zestati. Kak god da zmučeni sme i kak god da teške nam je, molitvica ta ne same da nas bu zdigla nek nas bu i vse skup med zvezdice poslala. Z molitvicu mam buju nam kriliče zrasle i mam bume ljehki kak perjiče bili. Same molitva donesla bu nam une kaj vsaki med nami največ si želi – a te mir je kaj h srčeku vsaki med nami štel ga bi. Življenje se potepsti bez brige more, ak se po stezice krive zaputiš, vse prejti more ti unak i unam gde najmenj vsaki te med nami bi si štel. A pak po druge strani, ak življenje si praf posložiš, ak se držiš vsega unoga kaj nam Je kak dara ostavil, na prvom mestu molitve, ak nigdar ti se ne dogodi da ne same da ga pozabiš neg da ga i odhitiš, unda ti zaistinu h vsemu tomu niti nemre brig biti.

Brig buš mel, ovak ili unak, ali te neju bile brige kak su nam une vsagdajnje, te buju brige tere buju same za tem išle – da se pitali bume e sme se praf pririhtali, e sme se praf porihtali, e sme praf posluhnuli i e sme praf spelali. Z molitvicu pravu nigdar hkaniti nemreš se a iste tak niti nikoga drugoga hkanil neš. Molitvica najdrajša za vse nas skup se kaže kak une najvrednejše, une kaj nam je kak darek najvrednejši poslane, darek prek teroga se z najdrajšem Jezušekem spominati moreme. Da te nie same tak, da te se ne same splati nek da se te tak jedine more i mora, te med nami mnogi niti ne razmeju a ma i uneh kaj te razmeti ni nečeju. Za razmeti je une kaj do hčere su se zvezdice črlene klanjali, kaj pred nju su klečali, kaj dok vsikud se zločica ta nie čistem rastepla - još verovali niesu da te nie spasitelj im najmilejši. Tak je bile, nie ljehke gda te skore prek pedeset ljet vučiju kak une kaj je prav ne vriedi, da su naopačni unie kaj po pravice su najbolši. Zaistinu te i tak vse te skup nie same tak za zdržati. Mnogi je natom putecu zglajzal. Te, kak i gda glediš, te morti i nie dugi putec kaj se pariti more z putecem kaj človek od gda je sveta i veka je prešel. Po druge strani ak glediš same jedne življenje – te skore je življenje ciele, te je skore potepljene življenje, jer nič druge niti sme mogli čujti a niti nas je mel gdoj drugomu putu nahčiti.

A i hutu tešku dobu, hute vrieme kaj nie ljehke bile, furt se našel nehči kaj se je zmislil. Kak god da nie ljehke bile, kak god da vsaki med nami se popiknul mnogi put, kak god da več sme, ne same jemput, znali si študerati otom kak nič se ne splati, vse vsemu se sveklina poklje duge dobe kazati krenula. A bez molitvice nebi nam sveklina ni blizu bila, morti bi nas zločica i den denes još gnjela, morti nam dihati još i den denes dala nebi, gdo zna. Kak god i gda god, da molitvice bile nie, da se niesme navek zmislili na reči kaj Jezušek nas nahčil je, da nie bile sveklinice te na obloku, morti i nas denes bile nebi, morti i mi, vsi skup, nebi vse te naopačne zdržati mogli. I te zaistinu tak i je, jer te, kak god i z tere god strani – glediš, priznati moraš, priznati moraš da ljehke bile nie zdržati, da bez molitvice teške da te mogle bi nam ziti.

Same molitvica, molitvica kaj nam tuj je, z nju sme falu najlepšu povedali Jezušeku – za vse une kaj zanas je bil i bu, za domaju nam Horvacku, jedinu, za vse une najlepše kaj sme meli i kaj ž Njem nam došle navek i bu. Molitvica ta navek nam bu življenje zgrela, unda gda najžmekšejše nam bu.