Na tom mladom ljetu
tusti debelji
zdravi veselji.
Daj vam Bog
guščiče, račiče,
pune lagve vina
pune škrinje žita,
pune pobelare penez,
a največ mira
i Božjuga blagoslova....

diel je te novoljetne čestitke teru je sake nove ljete pred vrati čestitali, ilji su reklji, zrajil položar. Za položare su išlji dejčešinci tere nie bilje strah noči i dost jahki kaj su moglji prtiti snieg. Još je bilje kmene da je položar pred vrati stepel škornje pune snega, poropal po vrati kaj bi ga gazdi čulji, a unda je povedal svoje. Nie te bilje zabadave. Navieke je od gazdi nekaj dobil, pak su se dejčeci, teri su išlji za položara, hganjalji kaj bi došlji rajit med prvemi i kaj bi obišlji več hiž.

Več prejdene hiž bilje je več nečesa h žepu. Bilje je i hiž kam položari niesu štelji iti. Ilji su te bilji škrti i zločesti gazde, ilji su se čez ljete kaj dejčecem zamerilji. Kak god da su bilji škrti, senek njim je bilje krive gda se njihova hiža zaobišla. Nekak su misljilji da neju čez ljete imelji Božjuga blagoslova. Kak denes nema položara, a hnogi su več i na nje pozabilji, nie čude kaj se čez ljete z hiž se menje čuje veselje i radost. Bože moj, kak sme denes „bogati“. Sega na svietu imame od obljeke do košte, a ipak nam nekaj furt falji. Možda baš onuka z konca čestitke, negdašnjih položara. A morti nam falji baš zate kaj več nie položare. Nema nam gdoj onak od srca za željeti srečne ljete. Si sme nakak zfrčkani h nekakve halabuke. Pleča nam spritiskaju sakojačke bedastoče tere si sami spravljame. Nema gdoj več iti za položara. Niti zna, a borme da i zna nej njim se dalje.

Mladi dejčeki gubiju negdne novoljetne noč h pajdašije z bambusem, škropcem ilji nekteru drugu, po novem rečenem, cugu. Sreča je če i potrefiju bez pomoči na hižna vraca, a kamolji da bi još išlji za položara. A starejši pak ne zaostajeju za mlađeriju pa unda zgledi kak da se med sobu hganjaju. I unda gda se dokopaju svojuga oltara za počinjek da njim z topi tučeš po vrata ne bi čulji. Tek k večerke ljudi zmučeni od jela i pila poljehku dojahaju k sebe. One kaj je ipak ostalje po starem, po nekakva starinska šega je veljike obilje na Nove ljete. Negda se misljile da se kaj se dogaja na Nove ljete tak bu čez cilu ljetnicu tera prihaja. Stolji su moralji biti puni i te svinjskuga mesa. Nikak ne živačuga. Bilje je te zate jer svinja ruje zemlju napre, pak tak unda i gospodara pe napre. Nie se smelje jesti puranjske ilji kokošine mese na Nove ljete jer kokoš i pura brcaju zemlju otraga. Unda bi ne daj, Bože gospodara krenula na rikverc. Če si bil na nove ljete siti značilje je te da čez ljete ne h želucu skruljilje. Si su bilji veselji, nasmejani, raspopievani.

Nišče se nie štel svaditi, nišče se nie štel plakati, makar bi mu morti bilje i za plač. Bilje se strahu da nej bilje takve plačne ljete. Pod okna su znalji pajdaši teri su igralji kakve štrumente h večerku zaigralji i zapopievalji pesme tere su se hu tem Božičnem i Novoljetnom cajtu popievale i igrale. Z maljih, več potleušic nek prave hižic, dišala je radost življenja. Treslji su se poceki od sreče tera je bila za stoljem, hu ta mala hižica. I cucki bi bilji tihe jer su i oni za svetek dobilji bolju kostu. H miru su i mački prelji pri komljinu, pokrilji vuha z repem kaj njim nej grljeni smieh drapal vuha. Kak je smieh grmel po hiža tak je zgledalje da i dim z rafunga leti prema zvezdanem nebu.

A tuj i tam po bielje kroveke kak šaka zviezdi spustile su se iskre tere bi skakale z špareta čez dimljak gda bi gazdarica fiže metala na ogenj i rašila žerahku. Leteče i goruče iskre kak da su ostavljale trag na bieljem krovu z teruga se moglje prečitati, one kaj i ja denes vam želim:
„SREČNE VAM NOVE LJETE!“