Priču teru sem čula i ja od druge od srca denem kak dare pod vaš cimer. A priča ide ovak:

...Bistri potočec veselje je poskočil med veljikami kameni i poljehku se počel korutati. Skalal je on z kameneka na kamen i z puti je pobiral veselu družinu sakojačke kamenjčeke. Kamenjčeki su se hganjalji jedni pred drugemi, trunčilji, požuravalji i skup z potočekem igralji. Dalje od te vesele družine kamenčeke, malje postrani bilji su dva, skore jednaka, plava kamenčeka. Oni su se držalji dalje od vesele družine. Nekak su si misljilji da nejdeju hu tu branžu od kamienja. Niesu se štelji zmiešati med te bramaste, bielje, zelenjkaste ilji čak črne pajdaše. Plavi kameni držalji su se jeden druguga. Niesu se obaziralji na te kaj jih je potočec štel deti h kolje gda se poigral z kamenjem i nosil na kriljima biele čipke teru je od veselja tkal. Plavi kamenčeki su imelji svoje spomenke i jeden i drugi bilji su ilji napre ilji otraga od vesele družine.

„Kaj bi se mi ž njimi družilji“, rekel je jeden plavi kamen. „Mi sme nekaj druge od njih. Plavi sme kaj nebe, a bljeskame kaj zviezda na nebu. Mi bume ionak završilji na prstenu ljiepe princeze o tere je poviedala pastirica gda je sedila kre potoka.“

„Če neme na prstenu ilji na klaružu, sigurne bume završilji na kraljičine krune“, dodal je drugi kamen. Pri tomu se obrnul od vesele skupine kamenčeke teri su se spuščalji kre njega.

Plavi kameni su se držati skupa i čakalji da jih gdoj pobere. I zbilja. Gda se več potok zmiril i nie jih več štel zvati h kolje, mirne su se zlježavalji i grelji na suncu. Bljesikalji su se z vode i jeden pred drugem štimalji. Unda su jih najmput zgrabile dvie hrapave ruke pune žulji. Premietale su jih med sobu, a njim se h glave vrtelje. Ne same od premietanja nek i od hudoče. Srdilji su se, kak se te grube ruke ž njimi tak ljiepemi moreju ponašati. Jedna jih je za čas diela h zgužvanu zamazanu krpu.“Fuj“! kričal je jeden. „Odvratne“, dopunil je drugi. Dušilji su se h krpe po žepu jen kratki čas.Unda su došlji na zrak. Nešče jih je hitil na nekakef špleh i na njemu su se malje žukalji. Nad njimi su krljesierile ruke, sklapale se, vudirala ruka po ruke. Hitalji su je z ruke h ruku i več njim se mantralje h glave.

Unda je larmanje htihlje, a nje je jedna ruka zamotala h črljenu, mehku i ljiepu krpu. Rahlje jih je diela h kutiju i nekam krenula ž njimi. „Sigurne ideme h dvorac“, rekel je jeden plavi kamen.“A možda ideme najprie k zlataru ilji draguljaru“, gizdave je rekel drugi. „ Mi radi svoje ljepote nič ni druge niesme zaslužilj.“ Skore su več zadriemalji na mehkem baršunastem platnu gda jih je svetelje požugljalje. Jedna niežna ruka stiha je zvadila najprie jeden kamen, a unda drugi i smočila ga h nečemu. „Fuj!“, rekel je jeden plavi kamen. „Odvratne“, dodal je drugi. Pak oni su nas smočilji h cementu. Fuj. Te nie za nas. Mi sme plavi kameni. Najljepši i najvredneši. Tak se z nami nemre delati.“ Bunilji su se i ragoborilji. Nič njim nie pomoglje. Našlji su se čvrste stegnuti h nekakva jamica. Borilji su se da z njih zideju van, alji nikak se nie dalje. One kaj jih je još več srdilje kaj je pred njimi hodilje pune ljudi i lukalje hu nje.

„Kakva sramota, za nas dva prekrasna, najljepša na svietu kamena, da završime zamazani z cementem i kak pribiti“, jambralji su jeden i drugi. Cukalji su se i cukalji, ne bi li nekak duknulji z toga okova i krenulji iskat kraljevsku krunu kaj bi ju krasilji. Jeden od kamena videl je kak kre njih z stropa pečine kaplje voda. Prosil je kapljice da kapljeju po nji, kaj bi se ščem prie oslobodilji „zatvora“. I kapljice su tekle po nji. Oni su se se več borilji kaj bi se oslobodilji. Ljudi su i dalje hodilji i hu nje lukalji. I odjepum sloboden je bil jeden, a po času i drugi. Od veselja su skakalji jer su se oslobodilji te grde i sive „robije“ gde su bilji. Postalji su sigurni da njim je put prema prstenu ilji krune kraljevne bil otprt. Prie nek su krenulji osvrnulji su se da vidiju meste gde su bilji zarobljeni. One kaj jih je zapanjilje bilje su dvie veljike prazne rupe, na glave kipa Majke Božje.

Unda su tek skužilji da su oni bilji njenje iči. Štelji su jen drugomu nekaj reči, alji nisu stigli. Veljii žmehki škorenj pritisnul je najprie jednuga, a potem i druguga plavuga kamena gljiboke h zemlju. Nutre su još gljiboke h zemlje. Na nje su več davne pozabilji malji sivi, zeleni i črni kamenčeki teri se još furt skupa igraju h potočecu.